Opozita në Shqipëri: Policia nuk mund t’i ndalë protestat

Kryetari i Partisë Demokratike, Lulzim Basha, duke iu referuar shoqërimeve dhe procedimit penal nga policia të disa protestuesve, ka thënë se asgjë nuk do t’i ndalë ata për të larguar, siç tha ai, nga pushteti qeverinë Rama.

Basha deklaroi se përdorimi i militantëve dhe ushtarëve të krimit në Polici për të goditur qytetarët dhe kundërshtarin politik është tipari më i qartë i këtij regjimi të cilin ai e cilëson si kriminal.

“Unë dhe Partia Demokratike jemi të vendosur të mbrojmë me çdo mjet të drejtën për të protestuar, të drejtë që e fituam pas 46 vjetësh të diktaturës më të përgjakshme në Evropë”, ka shkruar ai.