Panucci kërkon fitore me Norvegjinë

"Jemi gati për këtë miqësore dhe jam i bindur se do të zhvillojmë një ndeshje të mirë”, është shprehur trajneri italian

Trajneri i Shqipërisë, Christian Panucci, ka folur për ndeshjen miqësore me Norvegjinë, që do të zhvillohet të hënën.

Ai theksoi se do të luajnë futboll sulmues dhe do të kërkojnë fitore, shkruan albinfo.ch.

“Skuadra ka punuar mirë, me seriozitet. Është një moment i sezonit ku është e vështirë të lësh skuadrën ku luan dhe të përkushtohesh në kombëtare. Jemi gati për këtë miqësore dhe jam i bindur se do të zhvillojmë një ndeshje të mirë”, është shprehur trajneri italian në konferencën për media.

“Nuk kam ndërmend të ndryshoj asgjë, kemi dëshirë ta mposhtim Norvegjinë, sikurse bëmë me Turqinë. Për të ardhmen dhe dy ndeshjet e qershorit kam një ide. Formacionin duhet t’ua them më parë lojtarëve, nuk do të ketë befasi. U dëmtua Lilaj, do të luajë Ramadani. Është një i ri me personalitet. Jam i bindur se do të jetë lojtar shumë i rëndësishëm për formacionin. Ka lojtarë që nuk kanë luajtur, por unë u jap besimin tim, kërkoj një impenjim më serioz nga ana e tyre”, theksoi Panucci.

Ai foli edhe për taktikën që do të aplikojë. “Unë nuk propozoj 4-3-3 nëse nuk e kam grupin. Mund të luaj edhe me skema të tjera, me një mbrojtje të palëvizshme. Sot po provojmë 4-3-3, por kam një skemë në kokë edhe për të ardhmen. Nëse nuk sulmon, nuk fiton. Nëse do ta luanim ndeshjen me Italinë me grupin që kam sot, jam i sigurt që nuk do të humbisnim. Që kur e kam marrë drejtimin e Shqipërisë, skuadra e sotme është më e forta”.

Në ndeshjen ndaj Norvegjisë, Strakosha, do të luajë nga fillimi. “Do të luajë Strakosha, kam folur me të dy. Berisha nuk ishte në gjendje të mirë. Në miqësoret e qershorit do të luajnë secili nga një ndeshje, pastaj për eliminatoret do të vendos se cili do të jetë titullar”, nënvizoi Panucci.