Parlamenti krijon bazën ligjore për miliardat e fondit të papunësisë

Të hënën, në ditën e parë të sesionit të vet vjeshtor, Dhoma Nacionale e Parlamentit miratoi bazën ligjore për financimin shtesë

Masa e zgjerimit të kompensimit të punës me orar të shkurtuar gjatë krizës së koronavirusit është duke e rritur koston e sigurimit të papunësisë (ALV) në Zvicër. Parlamenti kishte miratuar 14.2 miliardë franga për këtë qëllim në qershor, shkruan sda.ch.

Të hënën, në ditën e parë të sesionit të vet vjeshtor, Dhoma Nacionale e Parlamentit miratoi bazën ligjore për financimin shtesë. Vendimi u mor në mënyrë unanime, transmeton albinfo.ch.

Ky kontribut shtesë, i jashtëzakonshëm federal ka për qëllim të parandalojë që fondi i kompensimit ALV të arrijë kufirin e sipërm të borxhit prej 8 miliardë frangave deri në fund të vitit 2020. Kështu do të kemi frenim të rritjes së borxhit dhe kjo, nga ana tjetër, do të rezultojë në një rritje të kontributeve të pagave deri në 0.3 pikë përqindje nga 2021, përcjell albinfo.ch.

Ekziston një konsensus i gjerë i forcave politike se kjo do të thellojë krizën ekonomike.

Financimi shtesë tashmë është vendosur, por ai mund të jetë në dispozicion për ALV vetëm nëse ekziston një bazë ligjore për të. Me propozimin, i cili tani është miratuar nga Dhoma Nacionale, do të krijohet baza ligjore e cila mundëson që qeveria federale të sigurojë gjithashtu mbështetje të jashtëzakonshme për sigurimin e papunësisë në 2021 nëse është e nevojshme.

Propozimi tani i drejtohet Dhomës së Kantoneve (senatit). Ligji do të vihet në fuqi urgjentisht. Votimi për këtë do të bëhet vetëm kur dy dhonat të kenë rënë dakord për përmbajtjen.

Në një hap të parë, dy dhomat kanë miratuar një shtesë prej 6 miliardë frangash për ALV në maj.

---