Pas 17 vitesh, ndërpritet procedura për plaçkitje në dhoma të fjetjes!

Sipas një komunikate, dyshimi për pjesëmarrje në plaçkitje dhe në vrasje të një gruaje në Gerelafigen, nuk ishte vërtetuar asnjëherë

Njëri nga të dyshuarit për pjesëmarrje në “plaçkitjet e dhomave të fjetjes”, që ishin bërë tmerri i njerëzve të moshuar  në fillim të viteve të nëntëdhjeta, një shqiptar sot 42 vjeçar, mund të lirohet nga akuza për mungesë provash.

Ai qe akuzuar se në një plaçkitje të dhunshme të bërë në vitin 1992 në Gerlafingen, kantoni i Soloturnit, kîshte mbytur një grua 81 vjeçare. Por sipas një komunikate të prokurorisë kompetente, dyshimi për pjesëmarrje në plaçkitje dhe në vrasje nuk ishte vërtetuar. As edhe me “mjetet më moderne teknike, gjurmët tepër të pakëta, nuk dëshmonin për praninë e tij në vendin e krimit”, thuhet në komunikatë.

Kosovari, në vitin 1995 qe dënuar në mungesë me burgim shumëvjeçar por dënimi nuk qe bërë asnjëherë i plotfuqishëm, shkruan “Tageswoche”.

Në fillim të vitit 2010 procedura, për shkak të vjetërsimit, qe ndërprerë në disa pika të saj. Ndërkohë hetimet për plaçkitjen me vrasje të bërë në Gerlafingen kishin vazhduar, edhe për faktin se një familjar i të vrarës kishte ushtruar  ndaj kosovarit padi për vrasje të rëndë.

Aktualisht 42 vjeçari nga Kosova ndodhet në vuajtje të dënimit për një vepër tjetër penale në bazë të një vendimi gjyqësor në kantonin Thurgau. Pas kryerjes së dënimit ai duhet të lëshojë Zvicrën.