Pas sulmit në Zelandën e Re, fermeri dorëzon armën pas 20 vjetëve

Një fermer në Zelandën e Re, që tash e 20 vjet kishte në pronësi një armë gjysmautomatike, e ka dorëzuar atë në polici pas sulmit terrorist që ndodhi javën e kaluar në Christchurch.

John Hart u bind që mbajtja e një arme gjysmautomatike nuk ia vlente, pasi rrezikonte të përsëritej sulmi në të cilin vdiqën 50 persona.

Me thirrjen “Kurrë më”, Hart ka dorëzuar armën te autoritetet, ndërkohë dyqani i armëve “Gun City” në të cilën u armatos terroristi i Christchurch, ka vazhduar punën përkundër paralajmërimit të kryeministres Yacinda Ardern se brenda pak ditësh do ta  prezantojë ligjin e ri për armët.

“Kam pasur 10 armë në këta 20 vjetët e fundit. E kam një gjysmë-automatik. Armëmbajtja në Zelandë të Re është gjë e zakonshme në vendet rurale, prandaj shumë fermerë kanë armë. Por, nuk ia vlente që të rrezikoja që të përsëritet sulmi”, ka thënë Harti.