Koronavirusi: çast pas çasti

Pas vendimit të fundit në Zvicër: “Për një orë u shitën të gjitha maskat që kishim”

Maskat e disponueshme në Coop City në Bellevue të Cyrihut u shitën brenda më pak se një ore pasi Këshilli Federal njoftoi vendimin në fjalë

Sapo presidentja Federale Simonetta Sommaruga kishte njoftuar të mërkurën vendimin për detyrimin e maskës në transportin publik, në Cyrih tashmë kishte filluar “vrapi” për sigurimin e maskave.

Maskat e disponueshme në Coop City në Bellevue të Cyrihut u shitën brenda më pak se një ore pasi Këshilli Federal njoftoi vendimin në fjalë, shkruan blick.ch. “Asnjëherë nuk kam parë diç të tillë”, thotë një punonjës i Coop, transmeton albinfo.ch. Problemi është se furnizimi i ardhshëm nuk do të vijë para të premtes.

Megjithatë, farmacitë duket se kanë një depo më të madhe ku furnizohen. Vërtet që ka një rritje të papritur të kërkesave për maska ​​mbrojtëse nga momenti kur u njoftua lajmi për detyrimin për maska në transportin publik, përcjell albinfo.ch. “Por ne kemi maska ​​të mjaftueshme në magazinë. Dhe ndërkohë gjithashtu kemi kontakte të mira me shitësit me shumicë”, thonë farmacitë. Prandaj, ndonjë pengesë nuk pritet të ndodhë kaq shpejt, shkruan 20mimnuten.ch.

Përgjegjësit porosisin që të mos ketë vrap për blerjen e maskave me shumicë, sikundër kishte në fillim të pandemisë, për materje dezinfektuese dhe artikuj të tjerë, pasi që do të ketë mjaft për të gjithë.