Përdorimi i madh i energjisë nga inteligjenca artificiale nxit kërkimin për zgjidhje të qëndrueshme

@Envato

Inteligjenca artificiale (IA) po ngre shqetësime gjithnjë e më të mëdha për shkak të konsumit të lartë të energjisë dhe ujit, raporton agjencia AP.

Studiuesit po kërkojnë mënyra për ta përdorur vetë inteligjencën artificiale si mjet për të menaxhuar më mirë burimet energjetike dhe për të ulur ndotjen mjedisore.

Sipas të dhënave të Agjencisë Ndërkombëtare të Energjisë, qendrat e të dhënave që furnizojnë sistemet e IA konsumuan rreth 1.5% të energjisë elektrike globale gjatë vitit të kaluar. Parashikohet që ky nivel të dyfishohet deri në vitin 2030 nëse nuk merren masa për efikasitet energjetik.

Kjo prirje rrezikon të shtojë përdorimin e lëndëve djegëse fosile si gazi dhe qymyri, të cilat çlirojnë gazra serrë që nxisin ngrohjen globale dhe ndryshimet ekstreme të klimës.

Megjithatë, inteligjenca artificiale mund të shërbejë edhe si pjesë e zgjidhjes. Ajo mund të analizojë të dhëna për konsumin e energjisë dhe ndotjen për të optimizuar funksionimin e ndërtesave, për të karikuar pajisjet në kohën më të përshtatshme, si dhe për të ulur ndotjen në industrinë e naftës, gazit dhe transportit.

Ekspertët besojnë se nëse këto teknologji vazhdojnë të zhvillohen, ato mund të ndihmojnë në balancimin e energjisë së harxhuar nga vetë IA.

Efikasiteti në ndërtesa

Sipas studiuesit të teknologjisë Bob French, inteligjenca artificiale mund të përdoret për të rregulluar automatikisht ndriçimin, ngrohjen, ftohjen dhe ventilimin në ndërtesa bazuar në të dhënat e motit dhe përdorimit të energjisë. Ai thekson se rreth një e treta e emetimeve të gazrave serrë në SHBA vjen nga ndërtesat dhe banesat, ndaj përdorimi i IA në këtë fushë mund të ketë ndikim të rëndësishëm në reduktimin e ndotjes.