Përfituan 7 milionë euro nga shtetasit gjermanë në Call Center, kërkohet burg për shtetasin shqiptar

Prokuroria e Posaçme Kundër Krimit të Organizuar dhe Korrupsionit ka lexuar pretencën për 13 të akuzuarit për skemën e mashtrimit përmes “Call Center”, duke përfituar rreth 7 milionë euro nga shtetas gjermanë.

Gjatë seancës gjyqësore të zhvilluar, SPAK kërkoi 9 vjet burg për Erjon Kasmin, që konsiderohet personi kryesor që ngriti skemën e mashtrimit të shtetasve nga Gjermania përmes Call Center. Për Xhulian Xhafën, personin e dytë më të rëndësishëm të grupit, SPAK kërkoi dënimin me 8 vjet e 6 muaj burg, ndërsa për 11 të tjerët dënim alternative me shërbim prove.

Sipas hetimit, dyshohet se Kasmi, së bashku me 12 persona të tjerë, krijuan skemën e mashtrimit përmes thirrjeve telefonike të shtetasve gjermanë, duke i marrë rreth 7 milionë euro, transmeton atsh, përcjell albinfo.ch. Organi i akuzës ka sekuestruar më herët disa llogari bankare të të akuzuarve si dhe disa pasuri të paluajtshme. Pretenca e SPAK-ut parashikon për llogaritjen e zbritjes së 1/3 së dënimit për shkak të gjykimit të shkurtuar.