Përjashtohet nga partia deputeti Kastriot Rexhepi

Ai e shpëtoi Qeverinë e Zoran Zaevit nga shkarkimi

Deputeti i Lëvizjes “Besa”, Kastriot Rexhepi, i cili ishte dje kryetemë e zhvillimeve politike në Maqedoninë e Veriut, është përjashtuar sot nga partia.

Lajmin e ka dhënë kryetari i partisë, Bilall Kasami, i cili tha se Rexhepi dëmtoi prestigjin e partisë.

“Duke marrë parasysh veprimet e fundit të deputetit të Lëvizjes BESA, Kastriot Rexhepi, i cili ditë më parë nuk u paraqit në Kuvend, për të mbështetur mocionin e mosbesimit të qeverisë, me çka i njëjti veproi në kundërshtim me vendimin e partisë, me ç’rast dëmtoi rëndë edhe prestigjin e partisë, Lëvizja BESA, respektivisht unë si Kryetar partie, konform normave statutore, përkatësisht nenit 14, paragrafit, 3 pika 3.3 të Statutit të Lëvizjes BESA, anëtarin e lartpërmendur e përjashtoj nga të gjitha pozicionet partiake dhe të qenit anëtar i Lëvizjes BESA”, ka shkruat Kasami, transmeton Albinfo.ch.

Kastriot Rexhepi ishte deputeti i cili pamundësoi rrëzimin e Zaev-it, duke u larguar nga seanca në mënyrë misterioze.

 

---