Përse zviceranët blejnë në Gjermani më pak se më parë?

Gjatë vitit 2018 janë shtypur  15.9 milionë kuponë të gjelbër për kompensimin e TVSH-së ose 1.4 milion më pak që është një shifër për 8.1 për qind më e vogël se ajo e një viti më parë

“Turizmi” i shopingut” ose kalimi i zviceranëve për të blerë artikuj të përdorimit të përditshëm në Gjermani pothuaj gjithmonë ka qenë me levërdi për amvisnitë zvicerane. Kështu është edhe sot por megjithatë, gjatë vitit të kaluar, 2018 është shënuar një rënie e theksuar e mallrave që zviceranët kanë blerë në qendrat tregtare të fqinjit të madh, Gjermanisë, shkruajnë sot mediat zvicerane.

Këtë e tregon rënia e numrit të “kuponëve të gjelbër”, siç quhen dëshmitë e TVSH-së që shitoret gjermane ua japin blerësve zviceranë për të kompensuar pagesën e saj (rvsh-së) në doganë. Kështu, gjatë vitit 2018 janë shtypur  15.9 milionë kuponë të tillë ose 1.4 milion më pak që është një shifër për 8.1 për qind më e vogël se ajo e një viti më parë.

Ndonëse e gjithë kjo flet për një rënie të trendit të blerjeve në Gjermani, doganierët e relativizojnë atë. “Trafiku në vendkalimet kufitare është njësoj i lartë. Por rreshtat në sportelët e kompensimit të TVSH në pikat doganore të shtunave dhe në kohën e pikut nuk janë më aq të gjatë”, ka thënë një zyrtar në Zyrën Doganore të Gjermanisë në Lorrach, përcjell albinfo.ch. Kolegu i tij në zyrën tjetër, atë në Singen thotë: “Ndonëse ka një rënie të shifrave, ato vazhdojnë të jenë në një nivel ende të lartë”.

Por kjo ulje e blerjeve në Gjermani nuk duket të ketë shumë të bëjë me ndryshimin e kursit të euros në raport me frangun, që në fillim të vitit 2018 ishte 1.17 ndërsa në fund të vitit, 1.13. Kështu, frangu në fund të vitit u bë më i fortë, që nënkupton se fuqia blerëse e zviceranëve në raport me Gjermaninë është ngritur dhe ky zhvillim më shumë do ta stimulonte turizmin tregtar në Gjermani se sa të kundërtën. Prandaj një shpjegim tjetër duket se është më bindës kur duam të kuptojmë arsyen e uljes së vullnetit të turistëve të përmendur për të bërë pazaret e tyre në Gjermani. Përderisa konkurrenca ka bërë që në tregun zviceran të ketë ulje të çmimeve të artikujve për përdorim të përditshëm, në Gjermani është shënuar një trend i kundërt, pra ka pasur një shtrenjtium të tyre. Kështu, sipas një eksperti të Credit Suisse që e citon 20minuten.ch, nëse një vit më parë mesatarja e çmimeve të artikujve në Gjermani ka qenë 40 për qind më e ulët se ajo në Zvicër, në vitin 2018 ndryshimi është zvogëluar dhe ka rënë në rreth një të tretën. Kjo e ka bërë shopingun e zviceranëve në Gjermani më pak tërheqës se më parë.

Një shkak tjetër është sigurisht edhe  situata e rëndë sa i përket trafikut, gjegjësisht krijimi i kolonave të gjata në kufi me Gjermaninë, përcjell albinfo.ch. Dhe sigurisht, edhe mungesa kronike e vendeve për parkim gjatë vikendeve për shembull në Konstancë, që është “Meka” e këtij turizmi të zviceranëve.Ajo që është e sigurt në gjithë këtë rrëfim është se turistët zviceranë të shopingut marrin për çdo ditë pune mesatarisht nga 33.800 kupoinë të gjelbërpër t`i shtypur në doganë. Kjo, vetëm në zonën që e mbulon pika e dopganës në Singen.

---