Përvojat zvicerane përmirësojnë turizmin në Maqedoni

Do të shfrytëzohen potencialet turistike të Maqedoni duke aplikuar ekspertizën zvicerane në fushën e turizmit, tha ministri i Ekonomisë në Maqedoni, Driton Kuçi.

Këto komente ai i bëri pas nënshkrimit të memorandumit të mirëkuptimit dhe bashkëpunimit në fushën e turizmit me drejtoreshën e Programit zviceran për rritjen e punësimit, Rozandi Lowe, përcjell albinfo.ch.

Me memorandumin në fjalë është paraparë që në tre vjetët e ardhshme të rregullohet bashkëpunimi i ndërsjellë në fushën e turizmit dhe mikpritjes.

Ministri Kuçi dhe drejtoresha Lowe thanë se aktivitetet e ardhshme të parashikuara në memorandumin përfshijnë vendosjen e bashkëpunimit me shkollat e njohura në Zvicër, e cila do të mbështesë zhvillimin e aftësive në mesin e punëtorëve në fushën e turizmit dhe mikpritjes.

Rezultatet e pritshme të bashkëpunimit me programin IME të Ambasadës Zvicerane janë përvojat e Zvicrës për të nxitur zhvillimin e turizmit dhe përmirësimin e standardeve të punës në këtë fushë në Maqedoni.

Zvicra, shtoi ministri Kuçi, është një nga vendet me sektorin turistik më të zhvilluar dhe më të mirë të organizuar, përcjellin mediat në Shkup.