Petkovic zgjat për dy vjet qëndrimin te Zvicra

Përzgjedhësi i Zvicrës në futboll, Vladimir Petkovic, ka nënshkruar zgjatjen e kontratës edhe për dy vjet

Federata e Futbollit të Zvicrës ka njoftuar se reagoi me zgjatjen e kontratës pasi me punën e Petkovicit, Zvicra arriti të futej në top-katërshe të ranglistës së FIFA-s. Kjo federatë ka bërë të ditur se Petkovic është kërkuar nga disa klube, të cilat nuk i ka zbuluar.

Ekipi i Petkovicit ka fituar gjashtë lojë rresht në kualifikimet për Botëror, përfshirë edhe fitoren ndaj Portugalisë 2 me 0 në fillim të kampanjës. Portugalia pret Zvicrën më 10 tetor në ndoshta ndeshjen vendimtare të grupit.

Petkovici tani do të udhëheqë Zvicrën edhe në kualifikimet për Euro 2020. Ai erdhi në postin e përzgjedhësit pas largimit të Ottmar Hitzfeldit pas Botërorit 2014.