Petrit Vllasi: Kriza globale imponoi modele të reja të biznesit

“Rrethanat dhe ngjarjet e ndryshme globale kanë ndryshuar plotësisht tregun dhe kanë detyruar rregullime të modelit tonë të biznesit”

Eksperti i ri i financave, pronari i kompanisë së specializuar për hipoteka, “Financa AG” dhe bashkëpunëtori i Albinfo.ch flet për kushtet e bërjes biznes gjatë vitit 2022, që u karakterizua nga kriza dhe vështirësi të ndryshme. Ai sqaron për lexuesit tanë se si kanë ndikuar rrethanat globale dhe vendore në biznesin e tij e më gjerë.

Albinfo.ch: Si do ta vlerësonit vitin 2022 nga perspektiva e “Financa AG”?

Petrit Vllasi: Përveçse viti i parë për “Financa AG”, viti 2022 ishte një vit dinamik, plot sfida. Ndryshimet dhe ngjarjet e ndryshme globale nën të cilat kemi vepruar, kanë ndryshuar plotësisht tregun dhe kanë detyruar rregullime të modelit tonë të biznesit.

 Albinfo.ch: Cilën e konsideroni si të arriturën e vitit 2022 për “Financa AG”?

Petrit Vllasi: Fakti që kam arritur të pozicionohem në komunitetin tonë si pikë referimi për temën e financimit është një synim i arritur për mua.

Albinfo.ch: Ku ishin vështirësitë e biznesbërjes në vitin që po e lëmë pas?

Petrit Vllasi: Marrja e vendimeve të shpejta në përgjigje të ndryshimeve ekonomike globale, duke mos qenë i sigurt për pasojat, ka qenë sfida më e madhe gjatë vitit që po kalon.

Albinfo.ch: Si ka ndikuar rritja e normave të interesit të hipotekave në biznesin tuaj?

Petrit Vllasi: Sigurisht që kishte një ndikim të rëndësishëm në qarkullim. Ka krijuar pasiguri tek investitorët, të cilët pavarësisht kësaj, nuk kanë destabilizuar ndjeshëm financat, falë komunitetit tonë shqiptar, i cili megjithatë ka mbetur i pranishëm në investimet në pasuri të paluajtshme.

Albinfo.ch: Cilat janë planet e “Financa AG” për vitin e ardhshëm?

Petrit Vllasi: Projekti i “Financa AG” do të vazhdojë edhe në vitet në vijim me synimin që të vijojë të ofrojë gjithnjë e më shumë shërbime hipotekare, duke iu përshtatur situatës ekonomike që do të na prezantojë vitin e ardhshëm.

Albinfo.ch: Në lëmin e hipotekave, çfarë duhet të presim nga viti i ardhshëm? 

Petrit Vllasi: Patjetër, më shumë stabilitet. Tregjet financiare globale po priren të normalizohen dhe të reflektojnë zhvillime më të parashikueshme dhe më të buta.

Fillimisht falënderoj Zotin që më dha mundësinë për të nisur këtë aventurë dhe partnerët e mi që më kanë mbështetur dhe motivuar gjithmonë. Një falënderim i veçantë duhet t’u jepet edhe klientëve të mi që më besuan.

 

---