Policia e Kosovës me plan operativ për fundvit, shton personelin

Foto ilustrim

Polica e Kosovës ka njoftuar se me qëllim të menaxhimit të situatës së sigurisë ka hartuar planin operativ “fundviti – 2024 dhe fillimi i vitit 2025”.

Në njoftimin e Policisë thuhet se përmes këtij plani është paraparë angazhim i personelit shtesë të Policisë, me shtim të prezencës policore në rrugë dhe në ambiente të hapura, në sheshe e lokacione ku ka frekuentim më të madh të qytetarëve.

“Policia e Kosovës ka paraparë ndërmarrjen e masave parandaluese me shtim të prezencës policore në gjithë Republikën e Kosovës, përfshirë edhe zonat e ndjeshme, posaçërisht në ato lokacione me popullatë të përzier, përveç kësaj ka paraparë edhe ndërmarrjen e masave ligjore ndaj veprimeve të mundshme kundërligjore dhe luftimin e dukurive negative që mund të shkaktojnë jostabilitet në çfarëdo mase që e rrezikon rendin, qetësinë dhe sigurinë publike”, thuhet në njoftim.

Në kuadër të këtij plani operativ thuhet se do të ketë shtim të vigjilencës dhe prezencës së njësive të ndryshme policore në rrugë, siç thuhet, me qëllim që të mbikëqyret trafiku rrugor në mënyrë që të ndikohet në parandalimin e aksidenteve rrugore si dhe të incidenteve të mundshme në trafik.

“Policia apelon që përgjatë frekuentimit të trafikut rrugor të respektohen të gjitha dispozitat ligjore, shenjat e trafikut,  t’iu përmbahemi kushteve të rrugës, e në veçanti të mos drejtohen automjetet nën ndikim të alkoolit”, thuhet në njoftim.

Policia ka apeluar për kujdes edhe gjatë përdorimit të mjeteve piroteknike.

“Policia e Kosovës apelon tek të gjithë qytetarët, e në veçanti tek prindërit/kujdestarët, që të jenë të vëmendshëm në parandalimin e përdorimit të parregullt të mjeteve piroteknike (mjete plasëse-fishekzjarrë) nga fëmijët, me qëllim që të shmanget rreziku që mund të shkaktohet nga këto mjete ngase përdorimi joadekuat i tyre mund të sjellë pasoja të rënda”, thuhet në njoftim.