Portali zviceran: Shqipëria të kujton top destinacionet e Karibikut

Çmimet në hotele janë jashtëzakonisht të ulëta, plazhet janë ende të kursyera nga turizmi masiv ndërsa uji i pastër si loti të kujton top destinacionet e Karibikut

Foto ilustrim

Portali zviceran për turizëm, travelnews.ch ka bërë një listë me sugjerime se në cilat vende është më së miri të kalohen pushimet, sipas muajit të vitit. Kështu, gjersa për janar si top destinacion rekomandohet Xhamajka, për prill Maroku e për maj Mallorca, për qershor është Shqipëria vendi i preferuar për pushime verore, shkruan albinfo.ch.

Dhe, argumentet që portali profesionist i radhit në favor të Shqipërisë janë më shumë se bindëse…

Shqipëria, vendi që në perëndim kufizohet me Adriatikun, është më e lirë se Kroacia dhe pret më pak turistë se vendi i saj fqinj, Mali i Zi. Ajo ofron një larushi interesante të vargnmaleve dhe qendrave arkeologjike, në të cilat sikur ka ndaluar koha.

Krahas një pasurie të madhe të florës dhe faunës, Shqipëria ka dhe parqe të ndryshme nacionale. Çmimet në hotele janë jashtëzakonisht të ulëta, plazhet janë ende të kursyera nga turizmi masiv ndërsa uji i pastër si loti të kujton top destinacionet e Karibikut, transmeton albinfo.ch. Veç kësaj, 300 ditë me diell në vit flasin vetvetiu për përparësitë që ofron Shqipëria.

E gjithë kjo ilustrohet me një pamje magjepsëse të Ksamilit.