Pranohet iniciativa kundër “raserëve”

Iniciativa synon që "t`i dëbojë përfundimisht nga rrugët ngasësit e pandërgjegjshëm të makinave dhe t`i çojë ata në burg"

Ka plotësuar kushtet formale për tu proceduar Iniciativa për votim popullor kundër ngasësve të pandërgjegjshëm të makinave. Iniciativa e organizatës së viktimave të rrugës “RoadCross” që mban moton “Mbrojtje nga ngasësit e shpejtë”, ka mundur të grumbullojë mbi 100 mijë nënshkrimet e nevojshme për votim.

“RoadCross” synon që me votimin që do të mbahet, “t`i dëbojë përfundimisht nga rrugët ngasësit e pandërgjegjshëm notorë dhe t`i dërgojë ata në burg. Sipas iniciativës, edhe ata që kapen për herë të parë duke ngarë veturën me shpejtësi mbi të lejuarën, duhet të dënohen me dorëzim të patentshoferit për së paku dy vjet.

Iniciativa është përshëndetur nga deputetët e gjithë spektrit politik të Parlamentit nacional shkruan swissinfo.ch. Ndërkaq kundër iniciativës është shprehur shoqata e komunikacionit rrugor “Strasseschweiz”, e cila tërheq vërejtjen se me këtë iniciativë po kriminalizohet shumica e pjesëmarrësve të motorizuar në komunikacionin rrugor.

Ndërkohë, Qeveria Federale, përmes pakos së masave “Via Sicura” ka përvetësuar tashmë synimin që ka iniciativa dhe i ka propozuar parlamentit dënime më të ashpra si dhe periudha më të gjata të dënimit me marrje të patentshoferit për ngasësit e shpejtë.

Propozimi i qeverisë konsiderohet si kundërpropozim indirekt me rastin e mbajtjes së iniciativës.