Prenkaj emërohet drejtor i Akademisë Diplomatike

Vendimi i ministrit Hoxhaj, pason vendimin e Qeverisë së Kosovës për themelimin e Akademisë Diplomatike me seli në Prizren

Ministri kosovar i Punëve të Jashtme, Enver Hoxhaj, ka emëruar Ambasadorin e parë të Republikës së Kosovës në Itali, Albert Prenkaj, Drejtor të Akademisë Diplomatike të Kosovës, me seli në Prizren. Vendimi i ministrit Hoxhaj, pason vendimin e Qeverisë së Kosovës për themelimin e Akademisë Diplomatike.

“Akademia Diplomatike e Kosovës si institucion publik do të merret me përgatitjen dhe formimin profesional të anëtarëve të personelit në shërbimin e jashtëm, duke u mbështetur në parimin se politika e jashtme moderne duhet të funksionojë duke u mbështetur në studim, hulumtim dhe ngritje të kapaciteteve permanente të stafit”, konsideron MPJ nëpërmjet një komunikate .

Akademia po ashtu do të hartojë dokumentet strategjike, relevante të politikës së jashtme, do të merret me trajnimin e diplomatëve të Kosovës, si dhe me organizimin e konferencave, forumeve, takimeve rajonale dhe seminareve për çështjet e politikës së jashtme si tërësi.

“Akademia Diplomatike do të jetë një urë e fuqishme që do ta lidhë Kosovën me qendrat e mëdha të vendosjes politike|, thuhet më tej në njoftimin e MPJ-së.

Selia e kësaj diplomacie do të jetë në Prizren, ndërsa vendim është marr nga Qeveria e Kosovës dhe është bërë publik në korrik të këtij viti nga shefi i diplomacisë kosovare, Enver Hoxhaj, gjatë një vizite në Prizren.