Presidentja e Kosovës në Austri, diskuton të ardhmen euroatlantike të vendit në Forumin Evropian Alpbach

Foto FB: Vjosa Osmani

Presidentja e Kosovës, Vjosa Osmani, po qëndron për vizitë në Austri, ku ka marrë pjesë edhe këtë vit në Forumin Evropian Alpbach dhe ka zhvilluar një diskutim të rëndësishëm me të rinj dhe të reja nga mbarë bota.

Osmani në këtë ngjarje ka theksuar rëndësinë e mbrojtjes dhe promovimit të vlerave demokratike, si dhe të ardhmen euroatlantike të Kosovës.

Përmes një postimi në rrjetin social “Facebook”, ajo ka shprehur kënaqësinë për ftesën që i është bërë edhe sivjet nga Forumi Evropian Alpbach, duke e cilësuar diskutimin me të rinjtë si një mundësi të vlefshme për të ndarë mendime dhe ide mbi sfidat dhe mundësitë që përballen Kosova dhe Evropa, transmeton albinfo.ch.

“Sot, në një diskutim dinamik me të rinj dhe të reja nga e gjithë bota, u përqendruam në tema të rëndësishme që prekin Kosovën dhe Evropën, të ardhmen euroatlantike të vendit tonë, si dhe rëndësinë e mbrojtjes dhe promovimit të vlerave tona të përbashkëta demokratike”, ka shkruar ajo.