Presidentja Osmani në Bruksel, përfaqëson Kosovën në Samitin BE–Ballkani Perëndimor

Presidentja e Republikës së Kosovës, Vjosa Osmani, ka udhëtuar në Bruksel, ku do të marrë pjesë në Samitin e Liderëve të Bashkimit Evropian dhe Ballkanit Perëndimor, përkrah krerëve të shteteve anëtare të BE-së dhe liderëve të rajonit, përcjell albinfo.ch.

Në kuadër të këtij samiti do të diskutohen marrëdhëniet dhe partneriteti ndërmjet Bashkimit Evropian dhe Ballkanit Perëndimor, me fokus të veçantë në procesin e zgjerimit të BE-së dhe avancimin e perspektivës evropiane të vendeve të rajonit. Gjatë qëndrimit në Bruksel, Presidentja Osmani do të zhvillojë takime me liderë të institucioneve evropiane, si dhe do të ketë bisedime me përfaqësues të tjerë të lartë pjesëmarrës në samit për çështje me interes për Kosovën.

Heqja e masave ndaj Kosovës dhe përshpejtimi i hapave drejt integrimit evropian pritet të jenë ndër temat prioritare që Presidentja do të adresojë gjatë diskutimeve.

Në agjendën e samitit përfshihen gjithashtu temat që lidhen me Planin e Rritjes për Ballkanin Perëndimor, forcimin e integrimit ekonomik me tregun e përbashkët të BE-së, si dhe çështje të zhvillimit ekonomik, investimeve dhe reformave strukturore.

Po ashtu, liderët do të diskutojnë edhe për bashkëpunimin në fushën e sigurisë dhe mbrojtjes, përfshirë politikën e përbashkët të jashtme dhe të sigurisë, përballjen me kërcënimet hibride dhe kibernetike, menaxhimin e migracionit, si dhe sfidat e përbashkëta rajonale dhe evropiane.