Prezantohet patentë-shoferi me dizajn të ri në Kosovë

“Patentë-shoferët me dizajn të ri sigurojnë efikasitet të përmirësuar, pasi procesi është i shpejtë, transferon të dhënat dhe zgjatë vetëm disa sekonda si dhe është i sigurt dhe i qëndrueshëm”

Ministria e Punëve të Brendshme, përmes Agjencisë për Regjistrim Civil, ka filluar me lëshimin e patentë-shoferëve me dizajn te ri. Ministri Flamur Sefaj tha se patentë-shoferi me dizajn të ri si dhe patentë- shoferi mobil kanë shumë përparësi, pasi që mundësojnë saktësi më të madhe në procedurën e kontrollit të patentë-shoferit.

“Patentë-shoferët me dizajn të ri sigurojnë efikasitet të përmirësuar, pasi procesi është i shpejtë, transferon të dhënat dhe zgjatë vetëm disa sekonda si dhe është i sigurt dhe i qëndrueshëm”, theksoi ndër të tjera  ministri Sefaj. Ai theksoi se në kuadër të politikave të MPB-së, është që të ofrojë sa më shumë shërbime cilësore për qytetarët.

Drejtoi i ARC-së, Bekim Hoxha tha se dizajni i ri i patentë-shoferëve ka përfshirë ndryshimet e nevojshme që janë paraparë në përmbajtjen dhe formën e patentë-shoferit të Republikës së Kosovës, sipas  Ligjit për Patentë-Shofer, Ligjit për Rregullat e Trafikut rrugor  dhe direktivave të BE-së.