Pritje madhështore për Lenjanin në Kamenicë

Fotografitë e postuara në Facebook tregojnë që për Ermir Lenjanin ishte organizuar pritje madhështore në vendlindjen e tij në Kamenicë

Lenjani ishte shoqëruar në të gjitha takimet nga kryetari i Komunës së Kamenicës, Begzad Sinani.

“Ishte e mrekullueshme për mua që ta kaloj një ditë në qytetin tim, në Kamenicë. Falënderoj kryetarin e Komunës së Kamenicës, Begzat Sinanin për mirënjohje si dhe të gjithë të pranishmit. Pa përkrahjen tuaj unë nuk do të isha ku jam sot, prandaj faleminderit nga zemra qyteti im dhe njerëzit e mi. Ju dua.”, ka shkruar Lenjani në facebook.

Ermir Lenjanin ka marrë mirënjohje nga Komuna e Kamenicës për suksesin e treguar në kombëtaren e Shqipërisë.

Lenjani ka lindur më 5 gusht 1989 në Prishtinë. Ai është nga Karaqeva, komuna e Kamenicës dhe ka emigruar me familje në Winterthur në moshën 4-vjeçare. Karrierën e futbollit e ka filluar në akademinë e shkollës së Winterthurit. Më 2010-2011 është hazuar te Grasshoppers, për t’u kthyer prapë në Winterthur si titullar.

Në janar të vitit 2013 kartonin e tij e blen ekipi më i vjetër i Zvicrës, FC St.Gallen, që momentalisht mban pozitën e tretë me 26 pikë, pas Bazelit dhe Cyrihut.

Sipas portalit „Transfermarkt.ch“, kartoni i Lenjanit vlen 800 mijë euro.

Lenjani luan si mbrojtës i majtë në St. Gallen, kurse angazhohet si mesfushor anësor në kombëtaren shqiptare. Ai është 175 cm i gjatë dhe shquhet për të majtën e tij të fortë. Amir Abrashi është shoku dhe fqinji i tij i parë.

Për herë të parë në kombëtare është ftuar nga De Biasi në ndeshjen miqësore me Armeninë, në gusht të 2013-ës. Kurse shtetësinë shqiptare e ka marrë tek më 8 tetor 2013. Paraqitjet e tija më të mira në kombëtare janë fitorja si mysafir ndaj Portugalisë me rezultat 1-0.  Golin e parë Lenjani e ka shënuar kundër Danimarkës në ndeshjen e parë zyrtare në Elbasan Arena.

Sfida më e rëndë për të ka qenë ndaj Serbisë. Loja në Beograd është ndërprerë pak para mbarimit të pjesës së parë për shkak të dhunës së ushtruar nga huliganët dhe sigurimi serb ndaj lojtarëve shqiptarë të kombëtares sonë.

Në miqësoren e fundi Lenjani ka shkëlqyer si lojtari më i mirë në barazimin e Shqipërisë ndaj Francës.