Prokurori kërkon 20 vjet burg për vrasësin e 16 vjeçares

Sipas padisë bëhet fjalë për një “ekzekutim të vërtetë” pa asnjë arsye dhe nga egoizmi i pashembullt i të akuzuarit për vrasje

(Update, 17:25)

Sot në orët e pasdites, prokurori Andreas Kägi ka mbajtur fjalën e akuzës. Ai ka kërkuar për dorasin dënim prej 20 vitesh burg për veprat vrasje të rëndë, rrezikim jete dhe shkelje të shumëfishtë të ligjit mbi armëmbajtjen.

Veç kësaj, Sabit I. duhet t`i nënshtrohet edhe trajtimit ambulant psikiatrik. Lartësinë e masës së dënimit, prokurori e ka mbështetur edhe në sjelljen “e pashoqe” të dorasit para dhe pas gjykimit.

Sipas tij, veprimi i bërë nga Sabit I. është ekzekutim i vërtetë. Ndërkaq, nëse trupi gjykues nuk do të pranonte kualifikimin e veprës si “vrasje e rëndë”, prokurori, në arsyetimin e tij do të kërkonte 6 vjet heqje lirie për vrasje nga pakujdesia, rrezikim jete dhe shkelje të shumëfishtë të ligjit mbi armëmbajtjen.

Sot ka filluar në Gjykatën e Qarkut në Uster të Cyrihut procesi ndaj shqiptarit të akuzuar se në mars të vitit 2009, në Volketswil ka vrarë me gjakftohtësi të dashurën e tij 16 vjeçare, Celine Franck.

Prokuroria e ngarkon atë me vrasje të rëndë, rrezikim jete dhe veprime kundër ligjit mbi armëmbajtje. Ndërsa mbrojtja shprehet për vrasje nga pakujdesia.

Sabit I.,sot 23 vjeçar, i cili ka pranuar veprën, në përballjen me gjykatën ka thënë se “duke luajtur ia ka afruar revolen mikes në qafë, duke qenë i bindur se revolja nuk ka qenë e mbushur. Të parën herë që ia ka tërhequr këmbëzën, ajo nuk ka krisur, por të dytën herë po. “Thjesht, gjithçka shkoi ters”, ka thënë ai.

Motivi i vrasjes mbetet i paqartë. Sipas padisë bëhet fjalë për një “ekzekutim të vërtetë” pa asnjë arsye dhe nga egoizmi i pashembullt i të akuzuarit për vrasje.

Ai dhe mikja e tij sipas padisë janë zënë pasi që ajo ka marrë vesh se i dashuri i saj paska raporte edhe me femra tjera. Pasi ankesës së Selinës, ai e kishte përshkruar atë si “të bezdisshme”.

Gjyqtarët e kanë pyetur dorasin për arsyen e posedimit të një numri të madh të armëve, që i janë gjetur në shtëpi. Ai është përgjigjur se vetëm disa sish janë të tijat, ndërsa të tjerat u takojnë shokëve ose nuk janë armë të vërteta.

Sot pasdite Trupi Gjykues do të dëgjojë ekspertin e armëve ndërsa më vonë prokurorin dhe përfaqësuesin e palës së dëmtuar. Nesër, e marte, fjalën do ta ketë mbrojtja e dorasit. Gjykimi pritet të kryhet në fund të kësaj jave.