Protestë për vdekjen e dyshimtë në polici të azilkërkuesit afrikan

Është konstatuar se gambiasi i arrestuar nuk kishte qenë personi i kërkuar në Kantonin e Lucernit. Policia e kishte ngatërruar me të pasi që kishin pasur emrin, mbiemrin dhe ditëlindjen e njëjtë!

Keystone

Javën e kaluar kishte vdekur në një pikë policore të Lozanës një azilkërkues nga Gambia. Shkaku i vdekjes së të riut 23 vjeçar ka mbetur ende i pasqaruar. Me këtë shkas, sot, rreth 600 veta kanë demonstruar rrugëve të Lozanës, duke dënuar rastin dhe duke bërë përkujtimin e të ndjerit, shkruan sda.ch.

Ata kanë dënuar “kriminalizimin e imigrantëve të racës së zezë”, siç kanë thënë dhe kanë kërkuar një “hetim juridik me rrënjë” të rastit.

Sipas organizatës “Collectif R”, e cila është bashkorganizatore e manifestimit, azilkërkuesi i ndjerë, pak para se të vdiste kishte qenë i sëmurë dhe sapo e kishte lëshuar spitalin, transmeton albinfo.ch. Ai kishte pasur me vete një vërtetim të lëshuar nga autoritetete se ishte rast për trajtim emergjent.

Policia, ndërkaq, javën e kaluar e kishte pranuar gabimin e bërë nga ajo. Sipas saj, është konstatuar se gambiasi i arrestuar nuk kishte qenë personi i kërkuar në Kantonin e Lucernit. Policia e kishte ngatërruar me të pasi që kishin pasur emrin, mbiemrin dhe ditëlindjen e njëjtë!

Vdekja e azilkërkuesit ka qenë temë edhe në Parlamentin e Kantonit Vaud, të martë.

Prokuroria ka urdhëruar nisjen e hetimeve dhe po ashtu është caktuar edhe bërja e autopsisë së të ndjerit.