Jeta në Zvicër

Pse zviceranët preferojnë të paguajnë me para në dorë?

Muajin e kaluar zviceranët u bënë me kartmonedhë të re, atë në vlerë prej një mijë frangash.

Dhe kjo kartmonedhë nuk është një letër e zakonshme, por është ndër më të vlefshmet në botë, me një vlerë rreth 880 eurosh. Sipas shifrave të Bankës Kombëtare Zvicerane, më shumë se 48 milionë kartmonedha të tilla janë në qarkullim.

Ndërkaq, vendet e tjera po i largojnë kartmonedhat me vlera të larta dhe përdorimi i parave të gatshme po bie në vendet europiane, megjithëse me norma të ndryshme, shkruan bbc, përcjell albinfo.ch.

Por në Zvicër, paraja e gatshme po mbetet mjeti kryesor për kryerjen e pagesës. Këtu ekziston një lloj përshtypje se të gjithë bartin para me vete, ani pse ekonomia digjitale është në rritje.

Nëse të duhet të paguash një kafe me një kartmonedhë 100 frangash, nuk ke pse të kërkosh falje – askush nuk do të të pyesë nëse ke një kartmonedhë më të vogël.

Një hulumtim që ka kryer Banka Kombëtare Zvicerane (SNB) në vitin 2017, duke analizuar sjelljet e 2000 pjesëmarrësve, doli me të dhëna se 70 për qind e tyre kanë kryer pagesat me para të gatshme, përcjell albinfo.ch.

Por pse e preferojnë keshin zviceranët? Janë dy arsye të thjeshta. E para, paraja është konsideruar gjerësisht si pjesë e kulturës së tyre, dhe tjetra, zviceranët besojnë se përdorimi i parave kesh u ndihmon të menaxhojnë më lehtë shpenzimet e tyre.