Publikohet Fotografia Zyrtare për vitin 2020 e Qeverisë së Zvicrës

“Një mbledhje e mirë e Këshillit Federal është sikur një koncert i mirë. Secili jep më të mirën nga vetja”, citohet në një komunikatë të Kancelarisë Federale presidentja e re e Federatës së Zvicrës

Qeveria Federale e Zvicrës e ka publikuar sot fotografinë zyrtare tradicionale grupore të saj, një “ritual” ky që përsëritet në prag të çdo viti të ri. Kësaj radhe, fotografia është konceptuar në atë mënyrë që qeverinë e vendit e paraqet si një ansambël të muzikës kamertale (të dhomës), shkruajnë ost mediat zvicerane.

Më saktësisht: në foto duken ministret dhe ministrat federalë të ulur në një skenë koncertale, ndërsa në sfond të tyre duken instrumentet muzikore, transmeton albinfo.ch.

“Një mbledhje e mirë e Këshillit Federal është sikur një koncert i mirë. Secili jep më të mirën nga vetja”, citohet në një komunikatë të Kancelarisë Federale presidentja e re e Federatës së Zvicrës, ose shefja e Qeverisë për vitin në vijim, Simonetta Sommaruga.

Motivi i fotografisë së Qeverisë për vitin 2020 konsiston në ndërveprimin në politikë dhe në rëndësinë që ka kultura në një vend me diversitete siç është Zvicra, citohet Sommaruga më tutje.

Pjesë e kësaj fotografie, përveç shtatë ministrave (Qeverisë Federale) është edhe kancelari federal, i cili ushtron një post të natyrës administrative.

Porosia për këtë fotografi është dhënë nga presidentja e re dhe është shtypur në 60.000 kopje.

---