Punëtorët në pritje të 20 përqindëshit

Janë rreth 1730 punëtorë kosovarë që po presin me vite të tëra, për të marrë 20 përqindëshin nga shitja e ndërmarrjeve shoqërore. Durimit, sipas sindikalistëve, po i vjen fundi

Mijëra punëtorë kosovarë që kanë punuar me vite tëra nëpër ndërmarrjet shoqërore në ish-Jugosllavi, nuk i kanë marrë akoma 20 përqindëshin e shitjes së ndërmarrjeve nga procesi i privatizimit. Punëtorët, sipas sindikalistëve, e kanë humbur durimin nga pritjet më vitet të tëra.

Alush Sejdiu është nënkryetar në Bashkimin e Sindikatave të Pavarura të Kosovës. Ai shprehet kritik ndaj Agjencisë Kosovare të Privatizimit lidhur me vonesën e shpërndarjes së këtyre mjeteve.

Sejdiu tha për REL se punëtorët janë diskriminuar sa i përket kësaj çështjeje, sepse deri në tetë vjet duhet të presin që t’i marrin mjetet që u takojnë.

“Aty bëhen vonesa marramendëse. Ka tetë vjet që njerëzve nuk iu është shpërndarë 20 përqindëshi, edhe pse mjetet janë aty, dokumentacionin e kanë pasur aty. Ne nuk jemi fajtorë se a kanë apo nuk kanë staf që të procedojnë dokumentacionin”, deklaroi ai.

Ka shtatë apo tetë vjet që njerëzit, sipas tij, nuk e marrin 20 përqindëshin e shijes së ndërmarrjeve ku ata kanë punuar 20- 30 vjet, dhe sipas ligjit iu takon. “Dhe me ato kanë problem dhe bëhen lypsa me mjetet e veta, për të cilat kanë kontribuar me dekada”, thotë ai.

Zyrtarë të Agjencisë Kosovare të Privatizimit, ndërkaq mohojnë se po zvarrisin shpërndarjen e 20 përqindëshit. Arta Gosalci, zëdhënëse në këtë agjenci, thotë se janë duke punuar vazhdimisht për këtë çështje.

“Punëtorët e AKP-së janë duke punuar vazhdimisht për përgatitjen e këtyre listave. Ne pjesën tonë po e bëjmë në mënyrën më të mirë të mundshme. Kështu që për pjesën e mbetur të 20 për qindëshit mbetet vendimi i Dhomës së Veçantë të Gjykatës Supreme, që pa vendimin e tij nuk mund të shpërndahet 20 përqindëshi”, deklaron Gosalci.

Sidoqoftë, Agjencia Kosovare e Privatizimit ditë më parë ka ekzekutuar vendimin për shpërndarjen e pjesshme të 20 përqindëshit edhe për 21 ndërmarrje shoqërore.

Nga ky vendim do të përfitojnë 1736 punëtorë të këtyre ndërmarrjeve, kurse shuma e përgjithshme që shpërndahet tek ata është 2 milionë e 578 mijë e 326 euro.

Gosalci tregon se agjencia këtë shumë të mjeteve e bart në llogari të Bashkimit të Sindikatave të Punëtorëve të Kosovës, ndërsa kjo e fundit do t’i shpërndajë mjetet te secili punëtor në llogari individuale.

Që nga fillimi i privatizimit të ndërmarrjeve shoqërore, Agjencia Kosovare e Privatizimit ka shpërndarë mbi 77 milionë euro dhe kanë përfituar 36 mijë e 281 punëtorë. Kurse, gjatë këtij viti AKP-ja ka shpërndarë 7 milionë euro për 4 398 punëtorë, pa përfshirë këtu shpërndarjen e fundit.