Qytetarët e BE-së do të duhet të paguajnë për të kaluar Tunelin Gotthard

Tarifa, e cila do të prekte kryesisht turistët nga Gjermania dhe Holanda në rrugën e tyre për në Itali, pritet të jetë midis 30 dhe 60 franga

Mbi 90 anëtarë të Parlamentit të Zvicrës (Dhoma Nacionale) nga të pesë partitë kryesore po bëjnë thirrje për një tarifë tranziti për shoferët që kalojnë Zvicrën nëpërmjet Tunelit Gotthard. Plani është politikisht i ndjeshëm – ekspertët madje e konsiderojnë diskriminues, transmeton albinfo.ch.

Deputetët në fjalë janë pro idesë, e cila fillimisht lindi nga Simon Stadler, një anëtar i partisë së Qendrës (Mitte) nga Kantini Uri, siç raportohet nga “SonntagsZeitung”. Stadler po lufton për të lehtësuar kantonin e tij nga trafiku masiv i tranzitit nga vendet e BE-së në veri të Zvicrës në Itali dhe anasjelltas.

Në varësi të vëllimit të trafikut, tarifa, e cila do të prekte kryesisht turistët nga Gjermania dhe Holanda në rrugën e tyre për në Itali, pritet të jetë midis 30 dhe 60 franga për tranzit. Teknikisht, një tarifë e tillë mund të zbatohet relativisht lehtë me kamera speciale për monitorim.

Propozimi është politikisht shpërthyes. Ndërsa ideja është pritur me miratim të gjerë në Bernë – politikanë nga të Gjelbrit, SP, Partia e Qendrës, FDP dhe SVP e mbështesin idenë. Por ekspertët paralajmërojnë për situatën ligjore dhe diskriminimin e mundshëm ndaj qytetarëve të BE-së.

Megjithatë, iniciatori Stadler është i bindur se taksa është në përputhje me marrëveshjet dypalëshe me BE-në, përcjell albinfo.ch. Ai mori siguri për këtë nga Këshilltari Federal Albert Rösti nga Departamenti Federal i Mjedisit (DETEC). Ky i fundit nuk iu përgjigj një kërkese nga “SonntagsZeitung”.

Kay Axhausen, profesor emeritus i planifikimit të transportit në ETH Cyrih, për shembull, mban një pikëpamje të ndryshme. Ai e përshkroi propozimin për “SonntagsZeitung” si “qartësisht diskriminues ndaj të huajve”. Për më tepër, duke vendosur një tarifë të tillë, Zvicra do të siguronte që trafiku të zhvendosej në Austri dhe Francë.

---