Rama i quan “fantastike” planet e dhëndrit të Donald Trump për ndërtimin e vilave në Shqipëri

Kryeministri i Shqipërisë, Edi Rama, ka folur për investimet potenciale të dhëndrit të ish-presidentit amerikan Donald Trump.

Sipas tij, kjo është ofertë fantastike me potencial të jashtëzakonshëm për Shqipërinë.

“Shqiptarët do të fitojnë çka nuk imagjinohej vite më parë, sepse nxitja e këtyre zhvillimeve pasuron shqiptarët, rrit ekonominë, stimulon zinxhirin e prodhimit. Ata konsumojnë këtu. Shqipëria do të jetë konkurrente e ‘luanëve të Mesdheut’. Është aplikim që do ta shqyrtojmë sipas ligjit. Unë flas me fakte. Kemi ofertë fantastike me potencial të jashtëzakonshëm që do ta shqyrtojmë sipas ligjit”, ka thënë Rama, duke shtuar se ideja e tillë ka qenë para se ai të bëhej kryeministër.

Mediat në Shtetet e Bashkuara të Amerikës kanë hedhur dyshime për ndikimet politike në këtë projekt, e madje edhe për konflikt interesi, sidomos pasi Trumpi po tenton tjetër mandat në krye të SHBA-së. Në projektet e Jared Kushnerit është përfshirë edhe Richard Grenelli, ish-emisar amerikan për Ballkanin Perëndimor.

Sipas mediumit prestigjioz gjerman “Frankfurter Allgemeine Zeitung”, realizimi i këtij projekti potencial mund të ketë pasoja të mëdha, teksa ka përmendur edhe “marrëveshjen e planifikuar” për ndarjen e Kosovës./Koha.net