Rama për mediat italiane: Ja ku po gabon Kurti 

“Ndërkohë që kryeministri Edi Rama po pushon, vetëm pak ditë, në shtëpinë e tij të pushimit në Dhërmi, aeroporti i kryeqytetit shqiptar ”nuk fle”. Kështu e nis shkrimin gazeta e përditshme italiane “La Stampa”, në intervistën që ka zhvilluar me kryeministrin shqiptar Edi Rama, pak ditë pasi kreu i qeverisë postoi fotomontazhin e anijeve të ikjes së madhe të vitit ‘91, e cila bëri xhiron e mediave italiane. “Jemi pak si Italia e viteve ‘50. Kemi hequr damkën e emigrimit”, thotë ai.

Nga turizmi, investimet strategjike, marrëdhëniet me Italinë dhe Melonin, integrimi, marrëdhënia me Kurtin, Vuçiqin dhe Erdoganin, lufta në Rusi janë temat e trajtuara në këtë intervistë të Letizia Tortello me kryeministrin shqiptar.

Sa i përket tensioneve në Kosovë dhe mundësisë së një rreziku si Donbassi, Rama u përgjigj se askush nuk mund ta ritrazojë Ballkanin, nëse nuk dëshiron vetë ai. Sipas tij kjo është ëndërr e Putinit, por Serbia nuk mund të jetë Rusi.

I pyetur se ku po gabon Kurti, kreu i qeverisë shqiptare u përgjigj: “Unë e respektoj atë, por do të bëja zgjedhje krejtësisht të ndryshme. Ai është i fiksuar dhe maksimalist. Ka një mundësi fantastike, planin e paqes franko-gjerman. Marrëveshjet nuk qëndrojnë në tavolina përgjithmonë. Pastaj, historia të bën të presësh”.

---