Kosova

Rama: Sa më shumë zgjatet konflikti në veri aq më shumë lëndohet Kosova

Kryeministri i Shqipërisë Edi Rama përmes një postimi në rrjetet sociale ka reaguar për sulmet në veri të Kosovës ku mbetën të plagosur dhjetëra ushtarë të KFOR-it.

Sipas tij përgjegjësia për një situatë të tillë i takon dhunuesve.

“Lëndimi i ushtarëve të KFOR-it ngarkon me përgjegjësi të drejtpërdrejtë dhunuesit e tyre të verbër dhe fatkeqësisht lëndon Kosovën në sytë e aleatëve e miqve të saj të pazëvendësueshëm! Sa më shumë zgjatet ky konflikt i rrezikshëm dhe i panevojshëm, aq më shumë lëndohet Kosova! Nga ky udhëkryq ku konflikti kthehet e rikthehet çdo vit si produkt i të shkuarës, me Serbinë që ekspozon trupat në kufirin ku fuqia e saj është e barabartë me zero dhe Kosovën që ekspozon ngurrimin e saj për të finalizuar dialogun, dilet vetëm me dialog e me aleatë të fuqishëm!”, shkruan Rama.