Rama tregon se si një show holandez ndikoi në ndryshimin e perceptimit të holandezëve për Shqipërinë

Kryeministri Edi Rama solli në vëmendje rëndësinë që kanë produksionet e huaja në nxitjen e turizmit në Shqipëri dhe ndryshimin e perceptimit për Shqipërinë.

Gjatë çeljes së “Tirana Training Center”, një program që nxit zhvillimin e industrisë kreative në Shqipëri, Rama u shpreh shumë optimist se të gjithë ata që do të vijnë falë edhe këtij programi në Shqipëri do të mbeten me sytë mbrapa.

Kryeministri kujtoi ndikimin që solli reality show i famshëm holandez “Kush është i infiltruari”, në promovimin e destinacioneve turistike shqiptare ndaj publikut holandez.

Sipas tij, “ky show televiziv ishte një nga faktorët kryesorë të ndryshimit të perceptimit të holandezëve për Shqipërinë”.

“Ai perceptim u bë sebep i një raporti shumë të vështirë me Holandën në një periudhë disa vjeçare, kur pengoheshin të çeleshin negociatat pikërisht nga Holanda. Faktikisht të gjitha përpjekjet tona për të kontaktuar me produksionin e këtij show dështonin se përballeshin me atë mur paragjykimi për Shqipërinë. Ne e kishim bërë disa herë përpjekjen t’i drejtoheshim atij produksioni për të ardhur dhe bërë një edicion në Shqipëri dhe nuk kishim marrë asnjë përgjigje”, tha Rama.

Ndërkohë në kohën e pandemisë, kryeministri kujtoi se produksioni u afrua vetë, pasi kishin menduar të bënin edicionin e radhës në Ballkan për shkak të shifrave më të ulëta të infektimeve.

“Për të mos ndërprerë show-n ata menduan se ndoshta Shqipëria ishte vendi ku mund të provohej të bëhej show. Plani i tyre ishte të shkoni edhe në dy vende të tjera, por nuk lëvizën më nga Shqipëria. Ju mjaftoi një qëndrim për të thënë këtu është vendi, këtu do ta bëjmë”, tha Rama.

Sipas tij, ky shoë televiziv u bë ambasadori i Shqipërisë në Holandë.

“Pati një sukses të jashtëzakonshëm. Ata njerëz sot e gjithë ditën flasin me superlativa për Shqipërinë. Audienca e jashtëzakonshme e atij shoë u kthye edhe në një pjesë të turistëve holandezë gjithmonë e më të shumtë në numër. Ky ishte një nga faktorët. Ky është efekti imediat dhe ndonjëherë bombastik që kanë këto produksione për vendet që i zhvillojnë, ndaj është një garë mes vendesh për t’i realizuar sepse të gjithë e kanë kuptuar se përmes tyre promovojnë imazhin e vendit në funksion të tërheqjes së vizitorëve për turizëm”, shtoi Rama.