Reagimet nga bashkësia ndërkombëtare pas largimit të barrikadave

Keystone (AP Photo/Bojan Slavkovic)

BE, NATO e SHBA kanë përshëndetur heqjen e barrikadave të ngritura nga serbët lokalë në veri të Kosovës, por kërkojnë të bëhet kujdes me hapat që do të ndiqen tani, sepse situata, sipas tyre vazhdon të mbetet delikate, shkruan TCH.

Për të dërguarin e posaçëm të bllokut për dialogun, Miroslav Lajçak, niveli i mosbesimit mes palëve nuk ka qenë kurrë më i lartë se kaq, shkruan albinfo.ch.

Është e rëndësishme, tha ai, të mos lejohet që situata të kthehet në një krizë tjetër. “Liderët e Kosovës dhe Serbisë duhet të nisin të krijojnë një atmosferë të favorshme për diskutime produktive dhe për normalizimin e marrëdhënieve”, është shprehur Lajçak, sipas të cilit afati i marsit ka për qëllim të përcjellë seriozitetin e arritjes së një marrëveshjeje.

Komuniteti ndërkombëtar po ndjen një urgjencë të shtuar për ta zgjidhur çështjen mes Kosovës e Serbisë, shtoi aty. NATO-ja gjithashtu e mirëpriti heqjen e barrikadave në kuadër të përpjekjeve për të ulur tensionet mes Kosovës dhe Serbisë.

Zëdhënësja e aleancës theksoi sidoqoftë se pret nga Kosova dhe Serbia që t’u përmbahen angazhimeve të tyre, dhe nënvizoi se KFOR-i është i gatshëm të ndërhyjë nëse do të paraqitet nevoja, në përputhje me mandatin e tij të OKB-së për të ruajtur lirinë e lëvizjes.

Ambasadori amerikan në Serbi, Christopher Hill, nga ana tjetër, mendon se duhet një mënyrë politike për të qetësuar situatën në Kosovë. “Këto janë sfida të mëdha dhe ndërkohë e kemi një krizë, çka e vështirëson gjendjen edhe më shumë, sidomos nëse ndodhin ngjarje të papritura”, tha ai.