Reagon Çeku pas arrestimit të drejtorit të Shtëpisë së Kulturës në Bujanoc

FB

Ministri i Kulturës, Rinisë dhe Sportit i Kosovës, Hajrullah Çeku, ka reaguar pas arrestimit të drejtorit të Shtëpisë së Kulturës në Bujanoc dhe regjisorit të shfaqjes.

Ai ka akuzuar shtetin e Serbisë që, sipas tij, ka shfaqur ‘mosdurim nacional’, kur më 9 qershor, institucionet serbe ndaluan shfaqjen e dy filmave shqiptarë, të financuar nga Qeveria e Kosovës.

“Një ditë para shfaqjes së filmave, policia e Serbisë i merr në bisedë informative drejtorin e Shtëpisë së Kulturës në Bujanoc, producentin dhe aktorët e filmave. Pa asnjë motiv konkret, e madje duke e paragjykuar përmbajtjen e filmave, autoritetet serbe ndalojnë shfaqjen e filmave deri në një vendim të radhës”, ka shkruar ministri Çeku.

Ai ka thënë se ky akt më e pakta që mund të emërohet, është mosdurim nacional.

Çeku me tej ka thënë se është gabim të mendohet se Serbia ka ndryshuar.

Më datë 9 qershor, policia e Serbisë në Bujanoc ka shoqëruar në stacion policor drejtorin e Shtëpisë së Kulturës, Jetmir Ismaili, si dhe ka intervistuar aktorin Gani Veseli.

Me vendim të autoriteteve serbe, filmat nuk do të mund të shfaqën deri në përfundim të hetimeve.