Rebelohen 12 të burgosur shqiptarë në burgun e Gjenevës

Pas zënkës që ka ndodhur të dielën në mes të shqiptarëve dhe afrikanëve, ditën e martë 12 të burgosur shqiptarë në këtë burg kanë bërë përpjekje për rebelim

Skenat sikur në filmat amerikanë, me dyluftime klanesh të gangsterëve me prejardhje të ndryshme po bëhen gjithnjë më të shpeshta në burgjet zvicerane.  Së fundi të dielën që shkoi rreth orës 18 të mbrëmjes në burgun Champ-Dollon të Gjenevës një dhjetëshe të burgosurish shpërthyen në një konflikt të ashpër. Bëhej fjalë për një konflikt të një klani afrikanësh kundër klanit të shqiptarëve. “Lufta e bandave”  ka vazhduar edhe ditët në vijim, në oborrin e burgut, gjatë kohës për shëtitje, shkruan gazeta “Tribune de Geneve”.

Si përgjigje, drejtoria e burgut ka ndëshkuar 11 pjesëmarrës të rrahjes masive duke ua ashpërsuar atyre kushtet e vuajtjes së dënimit. Por të martën 12 të burgosur shqiptarë në këtë burg kanë bërë përpjekje për rebelim. Ata kanë refuzuar të kthehen në qelitë e tyre duke protestuar kështu kundër ndëshkimit të bashkatdhetarëve të tyre. Për pasojë, është dashur të ndërhynin gardianët  për të vendosur rregullin në burg.

Sipas drejtorit të burgut qetësia është rivendosur.

Por, jo vetëm në Champ Dollon, shpesh në burgjet zvicerane ka luftë për primat në mes të dy grupeve të armiqësuara. Për këtë arsye në burgun e përmendur , të burgosurit janë ndarë qëllimisht në grupe ku nuk lihen bashkë pjesëtarët e një etnie që të mos bëhen mbizotëruese në numër.