Refugjatët përbëjnë shumicën e të dyshuarve për sulme seksuale

“Pjesa më e madhe e personave të dyshuar, në përgjithësi, radhitet në kategorinë e refugjatëve”, ka thënë prokurori i Këlnit, Ulrich Bremer

Vala e sulmeve dhe ngacmimeve seksuale që ndodhi natën e Vitit të Ri në Këln vazhdon të jetë ndër preokupimet kryesore të medieve gjermane e më gjerë. Së fundi kanë folur dhe prokurorët: Shumica e të dyshuarve të identifikuar lidhur me serinë e vjedhjeve  janë refugjatë, kanë thënë ata sot.

Krimet e përmendura kanë shkaktuar trazira në Gjermani dhe debat të ashpër lidhur me aftësinë e këtij vendi për t’i integruar gati 1.1 milion njerëz, që kanë kërkuar azil vitin e kaluar.

Prokurori i Këlnit, Ulrich Bremer, tha se deri tash janë identifikuar 73 të dyshuar, shumica prej tyre nga Afrika Veriore, shkruan radio Evropa e Lirë.

Ishin paraqitur gjithsej 1075 raste kriminale, përfshirë 467 sulme të dyshuara të natyrës seksuale, që mund të kategorizohen prej fyerjes e deri te dhunimi.

“Pjesa më e madhe e personave të dyshuar, në përgjithësi, radhitet në kategorinë e refugjatëve”, i tha Bremer agjencisë Associated Press, duke u shprehur se raportet aktuale, ku thuhet se vetëm tre të dyshuar ishin refugjatë, janë “marrëzi totale”.

Fillimisht, autoritetet e Këlnit ishin akuzuar se e kishin minimizuar faktin se në mesin e sulmuesve ishin shumë azilkërkues, për shkak të ndjeshmërisë politike të kësaj çështjeje.

Ndër të dyshuarit janë 30 shtetas të Marokut, 27 algjerianë, 4 irakianë, 3 gjermanë, 3 sirianë, 3 tunizianë, dhe nga një nga Libia, Irani dhe Mali i Zi, tha prokurori Ulrich Bremer, raporton AP.

“Ata kanë status juridik të ndryshëm, përfshirë hyrje ilegale në vend, azilkërkues dhe aplikues për azil”, tha Bremer për të dyshuarit e jashtëm.

Prej këtyre 73 vetëve, 12 janë të dyshuar për lidhje me krimet seksuale, megjithqë vetëm njëri prej tyre, një azilkërkues nga Maroku, i cili ka hyrë në Gjermani në muajin nëntor, është në burg, tha Bremer.