Regjimi kubanez përfiton miliona nga duhanpirësit e purove në Zvicër

Zvicra është tregu i tretë më i madh për purot kubaneze në botë. Në ishullin karaibian, në mes të një krize të thellë energjetike, kultivimi i duhanit mbetet një burim i rëndësishëm i valutës së huaj. Megjithatë, miliona fitime që gjenerohen nga ky sektor përfundojnë në favor të regjimit në pushtet.

“Shikoni sa e bukur është kjo fushë. Era i përkul gjethet e duhanit; pa të, do të ishte edhe më e bukur”, thotë Salvador Carvajal Rodríguez, një fermer 77-vjeçar që zotëron një plantacion prej 14 hektarësh në provincën Pinar del Río, në perëndim të Kubës. Aktualisht, korrja është në zhvillim e sipër.

“Ky vit ka qenë shumë i vështirë,” shton ai. Kriza energjetike në Kubë ka vështirësuar furnizimin me benzinë dhe energji elektrike, transmeton albinfo.ch.

Pavarësisht kësaj, ai thekson se prodhimi është i mirë: “Temperaturat ishin më të ulëta këtë vit dhe duhani rritet më mirë në mot të freskët. Natyra na ndihmoi.”

Ndryshe nga shumë prodhues të tjerë, Carvajal Rodríguez përdor qe për të punuar tokën dhe mbështetet pak në energjinë elektrike. “Disa fermerë ujisin fushat me pompa elektrike dhe sot këto kultura po vuajnë,” shprehet ai.

Eksportet ende të paprekura

Embargoja amerikane ndaj naftës dhe ndërprerja e furnizimeve nga Venezuela kanë përkeqësuar krizën energjetike në vend. Megjithatë, deri tani këto vështirësi nuk kanë ndikuar në shitjen e purove, të paktën në Zvicër.

Kërkesa për purot kubaneze, të njohura si “habanos”, ka tejkaluar ofertën prej disa vitesh. Sipas Louis-Charles Levy, anëtar i bordit drejtues të kompanisë Intertabak AG, “mund të shisnim lehtësisht 20% deri në 30% më shumë puro.”

Çmimet në tregun e purove kubaneze janë rritur ndjeshëm, kryesisht për shkak të rritjes së popullaritetit në Kinë. Për shembull, një puro shumë e kërkuar si Cohiba Siglo VI kushton rreth 100 franga për copë. Megjithatë, konsumatorët zviceranë duket se vazhdojnë ta përballojnë këtë rritje çmimesh.

Prodhim i diskutueshëm

Kompania Intertabak ka monopolin e importit të purove kubaneze në Zvicër dhe është në pronësi të përbashkët, ku gjysma i takon shtetit kubanez. Kjo do të thotë se çdo puro e shitur në Zvicër gjeneron të ardhura që përfitojnë drejtpërdrejt regjimin kubanez, duke arritur në miliona franga çdo vit.

E kontaktuar për këtë çështje, kompania nuk pranoi të komentojë dhe tregoi kujdes edhe në lidhje me kushtet e prodhimit në Kubë.

Gjashtë muaj më parë, organizata për të drejtat e njeriut “Prisoners Defenders” publikoi një raport ku thuhet se disa puro kubaneze prodhohen në burgje, ku mbahen edhe të burgosur politikë. Kjo është konfirmuar edhe nga kompania shtetërore kubaneze që menaxhon eksportet e purove.

Organizata e përshkruan këtë si punë të detyruar, ndërsa Intertabak e kundërshton këtë vlerësim. “E vetmja gjë që di është se në Kubë ekziston puna në komunitet për të burgosurit, si në çdo vend tjetër,” deklaron Louis-Charles Levy, duke pranuar megjithatë se është e mundur që puro të prodhohen në burgje në këtë kuadër.

Konsum i lartë, përfitime për regjimin

Një gjë mbetet e qartë: purot kubaneze konsumohen në sasi të mëdha në Zvicër. Dhe ky konsum gjeneron fitime të konsiderueshme që mbështesin regjimin në pushtet në Kubë.

---