Regjistrohet viktima e parë me koronavirus në Kosovë

Familjarë të viktimës kishin thënë se ai vuante edhe nga sëmundje kronike

Është shënuar viktima e parë nga koronavirusi në Kosovë. Një 86-vjeçar nga fshati Dumincë e Podujevës ka vdekur në Infektivë.

KOHA mëson se bëhet fjalë për babanë e një personi që po ashtu ishte i infektuar me koronavirus.

Familjarë të viktimës kishin thënë se ai vuante edhe nga sëmundje kronike, përcjell albinfo.ch.

Dy fshatra të Gjilanit, në karantinë

Komuna e Gjilanit ka shënuar dy rastet e para pozitive me virusin COVID-19, duke e çuar në 31 numrin e rasteve në Kosovë deri më tani. Nënkryetari i Gjilanit, Arbër Ismajli, ka thënë se dy fshatrat Zhegër dhe Vrapçiq do të futen në karantinë nga sot, por jo edhe qyteti i Gjilanit.

Dje janë marrë 66 mostra nga Gjilani për t’u testuar me koronavirus, dhe dy nga to rezultuan pozitivë.

Dy rastet janë nga fshatrat Zhegër dhe Vrapçiq të kësaj komune dhe nuk kanë histori të përbashkët.

---