Remitencat drejt Kosovës arrijnë 1.4 miliardë euro në vitin 2025, Gjermania dhe Zvicra kryesojnë

Remitencat e dërguara nga diaspora vazhdojnë të mbeten një ndër burimet kryesore të të hyrave për ekonominë e Kosovës. Sipas një grafike të publikuar nga Instituti GAP, gjatë vitit 2025 vlera totale e remitencave ka arritur në rreth 1.4 miliardë euro.

Të dhënat tregojnë se Gjermania dhe Zvicra dominojnë si dy burimet kryesore të remitencave. Nga Gjermania janë dërguar 541.4 milionë euro (rreth 39%), ndërsa nga Zvicra 250.2 milionë euro (rreth 18%). Këto dy shtete së bashku përbëjnë më shumë se gjysmën e remitencave totale që hyjnë në Kosovë, transmeton albinfo.ch.

Ndërkohë, Shtetet e Bashkuara të Amerikës kontribuojnë me 102.5 milionë euro (7%), duke u renditur në vendin e tretë. Pas tyre vijnë Austria me 59.3 milionë euro (4%), Italia me 54.3 milionë euro (4%), Franca me 48.4 milionë euro (3%), Suedia me 47.0 milionë euro (3%), Belgjika me 46.2 milionë euro (3%), Britania e Madhe me 36.9 milionë euro (3%) dhe Norvegjia me 29.8 milionë euro (2%).

Grafika e publikuar bazuar në të dhënat e Bankës Qendrore të Kosovës (BQK), nxjerr në pah varësinë e konsiderueshme të ekonomisë së vendit nga diaspora, veçanërisht nga shtetet e Evropës Perëndimore. Remitencat vazhdojnë të kenë rol kyç në mbështetjen e familjeve dhe zhvillimin ekonomik në Kosovë.