Restorantet në Zvicrën frankofone mbyllen sërish të shtunën në mbrëmje

Kantonet perëndimore ose frankofone të Zvicrës, nuk kishin pranuar mbylljen e lokaleve të gastronomisë, kur, më 11 dhjetor ishte marrë një vendim për këtë nga Këshilli Federal

Pas Kantonit të Gjenevës dhe atij të Jurës, edhe kantonet tjera frankofone, si: Vaud, Fribourg, Neuchâtel dhe Valis po shtrëngojnë masat e tyre kundër përhapjes së virusit të koronës.

Kështu, në kantonet e përmendura restorantet do të mbyllen nga e shtuna, 26 dhjetor në orën 23:00, ndërsa në Valis, nga ora 22:00.

Objektet sportive, ato të të kohës së lirë dhe objektet kulturore gjithashtu do të mbyllen.

Të hënën, kantoni i Gjenevës ka njoftuar se restorantet dhe objektet publike do të mbyllen përsëri, duke filluar nga ora 23:00 e së mërkurës.

Kantoni i Jurës tashmë ka tejkaluar vlerën e pragut prej 1 për numrin e riprodhimeve kështu që, nga e marta, do të kalojë në regjimin federal të masave kundër virusit.

Kantonet perëndimore ose frankofone të Zvicrës, nuk kishin pranuar mbylljen e lokaleve të gastronomisë, kur, më 11 dhjetor ishte marrë një vendim për këtë nga Këshilli Federal.

Arsyetimi i tyre ishte se në ato kantone kishte ulje të infeksioneve pasi që ato i kishin mbajtur mbyllur restorantet prej disa javësh, shkruan albimfo.ch. Në atë kohë, në pjesën tjetër të Zvicrës nuk kishte pasur mbyllje.

Por, ndërkohë ka pasur edhe në këto kantone një ngritje të numrit të infeksioneve dhe kjo ka shtyrë autoritetet e atjeshme që të marrin këtë vendim.

---