Riatdhesimi, datat e fluturimeve nga Gjermania, Anglia e Franca

Foto Ilustrim

Ministria e Infrastrukturës dhe Energjisë ka publikuar kalendarin e udhëtimeve që do të kryhen këtë javë, në kuadër të nisjes së procesit të riatdhesimit për shtetasit shqiptarë jashtë vendit dhe që duan të kthehen në Shqipëri.

Sipas njoftimit, ditën e sotme janë katër fluturime Tiranë-Bari, Bari-Tiranë, Tiranë-Romë dhe Romë-Tiranë.

Nesër, në datën 21 prill, do të jenë fluturimet Tiranë-Frankfurt dhe Frankfurt-Tiranë, në datën 22 prill do të jetë fluturimi Tiranë-Londër dhe Londër-Tiranë, ndërsa në datën 23 prill do të jetë fluturimi Tiranë-Paris dhe Paris-Tiranë.

Deri më tani “Air Albania” ka kryer fluturime riatdhesimi nga Stambolli, Roma dhe Milano. Krahas riatdhesimit të shtetasve shqiptarë, të cilët duan të kthehen në atdhe, kanë udhëtuar drejt Italisë edhe shtetas të huaj, të cilët kanë zgjedhur të largohen nga vendi ynë, si dhe shtetas shqiptarë rezidentë në Itali.

Personat e riatdhesuar, pas kontrolleve mjekësore në aeroportin e Rinasit, janë drejtuar për në Durrës në hotelet e përzgjedhura për karantinë, ku do të qëndrojnë për 14 ditë. E gjithë procedura e riatdhesimit mund të aksesohet on-line duke klikuar në faqen zyrtare të “Air Albania”, shkruajnë mediat shqiptare, përcjell albinfo.ch.