Rokeri Kravitz, koncert në majë të malit

Ylli i muzikës rok, Lenny Kravitz, ka performuar në malet e mbuluara me borë në Ischgl të Austrisë.

Kravitz, për dy orë rresht argëtoi të pranishmit që ishin mbledhur për t’i dhënë fund sezonit të skijimit.

Kravitz u tha të pranishmëve se kjo ishte hera e parë në karrierë që performonte në një mal me borë, ndërsa pak orë para koncertit tha se vendi ishte krejt ndryshe prej atyre ku kishte performuar më herët.

“Nuk preferoj të shkoj nëpër vende të ftohta, por e dua natyrën e malet. Ky koncert do të jetë fort interesant”, tha Kravitz, i cili nesër në mbrëmje do të mbajë koncert në Shkup.

I njohur për hitet “Fly Away” dhe “Are You Gonna Go My Way”, superylli amerikan shtoi se asnjëherë nuk ka skijuar dhe paralajmëroi se kishte ndërmend ta provonte një herë. Koncerti i tij u mbajt në 2 mijë e 300 metra lartësi mbidetare.