Rrëmbehet një zvicerane në Sudan

Sipas informacioneve të Agjencisë Zvicerane të Lajmeve SDA, e rrëmbyera është një punonjëse shumëvjeçare e organizatave që shpërndajnë ndihma humanitare

Në regjionin e trazuar të Sudanit, në Darfur është rrëmbyer një shtetase zvicerane. Ministria e Jashtme e Zvicrës ka konfirmuar se është në njohuri për rastin.

“Përfaqësia jonë në vnd (Sudan) është në kontakt me autoritetet lokale dhe sqarimet janë duke u bërë”, ka thënë zëdhënësi i ministrisë, George Farago për radion SRF. Ai ka theksuar se Zvicra po kërkon lirimin e menjëhershëm dhe të pakusht të gruas së rrëmbyer.

Ndërkaq, sipas informacioneve të Agjencisë Zvicerane të Lajmeve SDA, e rrëmbyera është një punonjëse shumëvjeçare e organizatave që shpërndajnë ndihma humanitare në vendin e prekur rëndë nga kriza. Një koordinuese e OKB-së thotë se zviceranja e rrëmbyer jeton dhe punon prej shumë vitesh në Darfur por nuk ka qenë punonjëse e OKB-së.