Rrëshqet një masiv shkëmbi mbi shtëpinë e një 25-vjeçari në Përmet, nxirret i gjallë

Top Channel

Një shkëmb ka rrëshqitur nga mali dhe ka rënë një banesën e një 25-vjeçari në Përmet.

Ngjarja ka ndodhur këtë mëngjes në fshatin Çarçovë. Sipas policisë, 25-vjeçari, i cili ka qenë në gjumë, ka mbetur i bllokuar në banesë dhe masa shkëmbore i ka zënë gjymtyrët e poshtme dhe i ka pamundësuar lëvizjen.

Ndërsa bëhet e ditur se shpëtuan bashkëshortja e tij dhe fëmija rreth dy vjeç.

Në dhomën tjetër të banesës ndodhej e ëma e të riut, që po ashtu shpëtoi pa lëndime.

Shefi i zjarrfikëses në Përmet, Agron Pani, tha për Top Channel se situata ishte shumë e vështirë dhe u desh një ndërhyrje shumë delikate për nxjerrjen e tij banesa. Pasi u nxor nga policia dhe forcat zjarrfikëse, i riu u dërgua drejt spitalit të Janinës.

Shërbimet e Policisë, zjarrfikësit dhe autoambulanca mbërritën në vendngjarje dhe pas një ore nxorën shtetasin me iniciale Dh.V. I riu ndodhet në spitalin e Përmetit dhe mjekët po vlerësojnë nëse do të duhet trajtim më i specializuar për dëmtimet që i riu ka në të dy gjymtyrët e poshtme.

Zona e Çarçovës është e kërcënuar prej shembjes së shkëmbinjve përgjatë të paktën dy dekadave të fundit. Incidente të ngjashme kanë ndodhur edhe në të shkuarën, ku shkëmbinj janë shembur mbi banesa dhe mbi mjete që përshkonin rrugën nacionale./TCH