Rreth 2 mijë gra dhe vajza, viktima të dhunës fizike gjatë vitit 2021 në Kosovë

Në anën tjetër, gjatë vitit 2021 janë raportuar 55 raste të ngacmimit seksual në Policinë e Kosovës.

Sot, më 8 mars 2022, kur shënohet edhe Dita ndërkombëtare e gruas, për fatin e keq duhet të rikujtojmë se jetojmë në një shoqëri ku siguria e grave dhe vajzave është ende diskutabile.

Vetëm gjatë vitit 2021 në Policinë e Kosovës janë raportuar 2 mijë e 456 raste të dhunës në familje, në 1 mijë e 986 prej tyre viktima kanë qenë gratë dhe vajzat, raporton Albinfo.ch.

Në përgjigje për Albinfo.ch, Policia e Kosovës ka thënë se kanë vazhdimisht bashkëpunim me institucionet relevante për parandalimin e dhunës si dhe trajtimin e rasteve me seriozitet. Ndërkohë, kanë theksuar edhe realizimin e fushtave në lidhje me raportimin e dhunës fizike.

“Ndër vite policia ka realizuar edhe fushata vetëdijesuese për pasojat e dhunës në familje duke e potencuar në vazhdimësi se dhuna nuk ndalet pa u raportuar, pa u trajtuar nga organet kompetente. Rastet e dhunës në familje janë raste të ndjeshme, dhe qasja e policisë karshi rasteve të dhunës në familje është si parandalimi për dhunën në njërën anë dhe si dhe trajtimi i rasteve më seriozitet, ka bërë që raste e tilla të vijnë duke u raportuar më shpesh, ndër vite”, thuhet në përgjigjen e Zyrës për Informim të Policisë së Kosovës.

Në anën tjetër, gjatë vitit 2021 janë raportuar 55 raste të ngacmimit seksual në Policinë e Kosovës./Albinfo.ch

---