Rreth 3 mijë turistë francezë vizituan Shqipërinë në janar

Ilustrim, Pixabay

E përditshmja franceze “News.day Fr” e ka cilësuar Shqipërinë si vendi ideal për të vizituar në 2024-n.

Kryeministri Edi Rama ndau në rrjetet sociale shkrimin e botuar nga mediumi francez.

“Natyra dhe plazhet shqiptare premtojnë të jenë pushimet e paharrueshme të francezëve për vitin 2024. Nën fokusin e promovimit të medieve franceze të udhëtimeve, ku së fundi “News Day Fr” dhe “A Vous Poitiers” e përshkruajnë Shqipërinë si një përvojë e pasur me zbulime për të gjithë të apasionuarit pas natyrës, traditave lokale dhe turizmit të aventurës, pa lënë mënjanë bukuritë e bregdetit”, theksoi Rama.

Rama bëri të ditur se “rreth 3 000 turistë francezë e kanë vizituar Shqipërinë gjatë janarit të këtij viti, një shifër premtuese për një treg në rritje nga vendet e Evropës perëndimore”.

Shkrimi i botuar nga e përditshmja franceze “News.day Fr” u nda në rrjetet sociale edhe nga ministrja e Turizmit dhe Mjedisit, Mirela Kumbaro.

“Me një vijë bregdetare 363 kilometra, e cila laget nga detet Adriatik dhe Jon, Shqipëria ofron plazhe të mrekullueshme me rërë, gjire dhe dete të veçuar, shpesh të konsideruara si “Karaibet e Evropës”. Përveç plazheve të shumta, vendi ofron edhe peizazhe piktoreske dhe qytete turistike. Ne ju sugjerojmë disa nga qytetet më të mira në Shqipëri për të vizituar”, shkruan ndër të tjera “News Day Fr”.