Rritet numri i punëtorëve të huaj nga zonat kufitare të Zvicrës

Vetëm në kantonin jugor, atë të Tiçinos punonin 65200 punëtorë “ndërkufitarë”, që ishte për 4.9 për qind ose për 3000 më shumë se para një viti

Në fund të muajit shtator në Zvicër kanë qenë duke punuar 317 mijë shtetas të huaj të vendeve që kufizohen me Zvicrën. Këta punëtorë që vijnë nga zonat kufitare përfitojnë nga rregullat që e favorizojnë punësimin e tyre. Numri i përmendur është për 2.8 për qind më i madh se ai i regjistruar në fund të shtatorit të vitit 2016, bën të ditur Zyra Federale për Statistikë, shkruan srf.ch.

Rritja më e madhe ndërkaq është bërë në kantonin jugor në Tiçino, ku vijnë për të punuar punëtorët italianë, transmeton albinfo.ch. Vetëm në këtë kanton punonin 65200 punëtorë “ndërkufitarë”, që ishte për 4.9 për qind ose për 3000 më shumë se para një viti.

Në këtë kanton ka pasur vazhdimisht ankesa nga banorët lokalë në adresë të këtyre punëtorëve.

Rritje mbi mesataren kishte edhe në regjionin e Cyrihut dhe në atë të Zvicrës Lindore.

Në regjionin rreth Liqenit të Gjenevës, që është zona me fluks më të madh nga fqinjët, kanë punuar 117.000 punëtorë të kësaj kategorie, përcjell albinfo.ch. Ndërsa në zonën e Zvicrës Veriperëndimore, (Bazeli me rrethina) që është e dyta për nga fluksi, kishte 71600 punëtorë të tillë.