Rritja e problemeve shëndetësore të lidhura me plastikën pritet të dyfishohet deri në vitin 2040

Foto ilustrim @unsplash

Një studim i ri ka paralajmëruar se efektet negative të plastikës mbi shëndetin, përfshirë gazrat serrë, ndotësit e ajrit dhe kimikatet toksike, mund të dyfishohen në mbarë botën deri në vitin 2040.

Hulumtimi, i publikuar në Lancet Planetary Health, analizon çdo fazë të ciklit jetësor të plastikës, nga nxjerrja e lëndëve djegëse fosile dhe prodhimi i materialeve, deri te asgjësimi i tyre në mjedis. Studiuesit identifikuan se këto ndikime mund të shkaktojnë sëmundje të frymëmarrjes, kancer, probleme të lidhura me ngrohjen globale dhe sëmundje të tjera serioze.

Ekipi i udhëhequr nga LSHTM, University College London dhe universitetet e Toulouse dhe Exeter përdori modelimin për të krahasuar skenarë të ndryshëm të prodhimit, përdorimit dhe menaxhimit të mbeturinave plastike midis viteve 2016 dhe 2040.

Sipas rezultateve, nëse situata mbetet e pandryshuar, ndikimet negative shëndetësore nga plastika mund të dyfishohen. Nga këto probleme, 40% lidhen me emetimet e gazrave serrë dhe ngrohjen globale, 32% me ndotjen e ajrit nga prodhimi i plastikës dhe 27% me kimikatet toksike të lëshuara në mjedis. Më pak se 1% lidhet me mungesën e ujit të pastër, ndryshimet në shtresën e ozonit dhe rritjen e rrezatimit jonizues.

Studimi parashikon se vitet e jetës së shëndetshme të humbura për shkak të plastikës mund të rriten nga 2.1 milionë në vitin 2016 në 4.5 milionë deri në vitin 2040.

Ndërhyrjet individuale, si rritja e riciklimit ose mbledhja e mbeturinave, nuk mjaftojnë për të zvogëluar ndjeshëm këto probleme. Megjithatë, një qasje sistemike që kufizon prodhimin dhe përdorimin e plastikës mund të ulë efektet negative me 43% deri në vitin 2040.

Megan Dinny, autore kryesore nga LSHTM, thekson: “Ndërsa konsumatorët kanë një rol të rëndësishëm, zgjidhja kërkon një ndryshim sistemik ‘nga djepi në varr’ në mënyrën se si prodhohet, përdoret dhe asgjësohet plastika.”