Lajme

Rritje e theksuar e numrit të grave në Parlamentin e Zvicrës

Nga 63 sa ishin, tani janë 85 gra deputete. Ose ndryshe: nga 32% tani ato përbëjnë 42,5% të parlamentit

Një ndër ndryshimet e mëdha pozitive që kanë sjellë zgjedhjet e djeshme në Zvicër është rritja e përfaqësimit të grave në Parlament. Nga 63 sa ishin në legjilsaturën e kaluar, tani janë 85 gra deputete, shkruan albinfo.ch. Ose ndryshe: nga 32%, tani ato përbëjnë 42,5% të Parlamentit

Suksesi i tyre është për aq më i madh, pasi që përqindja e grave që kanë kandiduar ka qenë 40%, ndërsa kanë fituar, 42.5%.

Por në Dhomën e Kantoneve (Senat), ku përqindja e grave ka qenë tradicionalisht shumë e ulët (13%), pasqyra nuk është e ende e qartë. Tash për tash vendin në Senat e kanë siguruar vetëm 5 gra, ndërsa edhe sa të tjera do të vinë, do të dihet pas raundit të dytë, më 24 nëntor.

Rritjes së pjesëmarrjes së grave në zgjedhje, por dhe suksesit të tyre në garë për vende në Parlament i ka kontribuuar apeli i organizatave të grave, i bërë në kuadrin e fushatës “Helvetia ruft” (Helvetia thërret), pak muaj para zgjedhjeve.