Rruga e Arbrit pa pagesë

Rruga është vepra e parë e projektit 1 miliard euro të shpallur nga Qeveria shqiptare. Ndërtimi i saj pritet të nisë brenda pak muajsh

Qeveria shqiptare ka vendosur se kalimi në Rrugën e Arbrit do të jetë pa pagesë. Kështu ka njoftuar ministri i Financave, Arben Ahmetaj.

“Nuk do të ketë pagesë për qytetarët, për automjetet. Në atë rrugë, relacioni i takon asaj çfarë sugjeron kompania, por Qeveria është shumë e qartë që ajo rrugë do të jetë pa pagesë”, ka thënë ministri i Financave, raporton “TCH”.

Rruga është vepra e parë e projektit 1 miliard euro të shpallur nga Qeveria shqiptare. Ndërtimi i saj pritet të nisë brenda pak muajsh. Rruga e Arbrit është rrugë në ndërtim e sipër e cila do të lidhë Tiranën me Dibrën në Maqedoni me një gjatësi prej rreth 75 kilometra, përcjell albinfo.ch.

“Maksimumi fundi i qershorit dhe fillimi i korrikut ne do të kemi një fitues të deklaruar dhe unë besoj që kantieri do të fillojë shumë shpejt pas deklarimit të fituesit”, thotë Ahmetaj.