Muzikë

Rrugëtim anembanë Evropës me shfaqjen ”Tok për kulturën tonë”

Me moton „TOK PËR KULTURËN TONË“, një grup shoqatash dhe artistësh shqiptarë nga vende të ndryshme evropiane do të prezentojnë së bashku një program të larmishëm me poezi, vallëzim e muzikë.

E enjte, 24 Dhjetor 2020 - 9:00 albinfo.ch

Artistë tashmë të njohur dhe artistë që janë ende në fillim të karrierës së tyre do të marrin shikuesit në një udhëtim artistik që çon në vende të ndryshme, si: Londra, Hamburgu, Berlini, Kölni, Zürichu, Vjena e deri në Itali, te Hora e Arbëreshëve, për të përfunduar në Prishtinë e Tiranë.

Ishte një diskutim mbi aktivitetet kulturore në diasporë pranë konnferencës „Diaspora Flet 2020“, që i bëri bashkë këto shoqata, të cilat vetëm disa javë pas koneferencës filluan bashkëpunimin e parë. E ky është vetëm fillimi. Kjo iniciativë synon të bëhet një platformë gjithëkombëtare që bashkon shoqata e artstë shqiptarë nga e gjithë bota. Potencial ka mjaft, e si duket edhe motivimi nuk mungon që të krijohet një platformë për prezantim më të denjë të kulturës sonë në botë.

Reagimet e para janë shumë pozitive. Shpresëdhënëse është sidomos gatishmëria e madhe e artistëve të ndryshëm të përkrahin këtë iniciativë. Programi do të trasmetohet live në kanalin e TOK në YouTube, më 26 dhjetor, nga ora 19.

Shoqatat dhe artistët pjesëmarrës:
1. Grupi KÀ – Vjenë

Eno Peçi do të përfaqësojë Vjenën në këtë program kulturor.

Eno Peçi është i lindur në Tiranë dhe i edukuar për balet në Akademinë e Baletit Tiranë dhe më pas në Akademinë e Baletit të Operës Shtetërore në Vjenë. Që nga viti 2000 është pjesë e Trupës së Baletit të Operës Shtetërore në Vjenë, ku në vitin 2009 u emërua solist i saj. Paralelisht, ai ka zhvilluar edhe karrierën e tij si koreograf i sukses‘shëm.

Ai është nderuar me çmimet më të larta shtetërore, sikurse me titullin ‚Ambasador Nderi‘ dhe ‚Kalorës i urdhrit të Skënderbeut‘ i Republikës së Shqipërisë, si dhe së fundmi i nderuar edhe nga Presidenca e Republikës së Austrisë me titullin më të lartë shtetëror ‚Kryqi i Nderit Austriak për Shkencë dhe Art‘ (Österreichischen Ehrenkreuzes für Wissenschaft und Kunst).
Por, më së miri për Enon, flet karakteri dhe sjellja e tij. Ai është jashtëzakonisht i thjeshtë, ashtu siç dinë të jenë vetëm njerëzit më të ndritur; bashkëpunues, motivues dhe tejet pozitiv, prandaj, mbështetja që ai i dha kësaj iniciative përmes veprës së tij ‚Muzg‘ të bërë enkas për TOK, ku edhe baleti dhe koreografia është e realizuar nga ai vetë, na nderon të gjithëve.

Me një zë unik, në të cilin gjejmë lirikën, bel canto-coloratura, shpirtin italian, francez, gjerman,…, siç e vlerëson kritika austriake ‘Neue Merker’, përsëri nga Vjena na bashkangjitet mezzo-sopranoja e nderuar Flaka Goranci.
Karriera e saj artistike filloi rrugëtimin në qytetin e Gjakovës, vazhdoi në Tiranë, Tel Aviv dhe Vjenë, nga ku arriti skenat më të rëndësishme të muzikës klasike në Austri, Gjermani, Belgjikë, Zvicër, Hungari, Çeki, etj.

Ajo realizoi disa nga rolet më të rëndësishme të operës, si atë të Olgës nga P.I.Tschaikovsky, Carmen nga G. Bizet, Dritte Elfe nga A. Dvorak, të Teresa nga V. Bellini, Ernestina nga G. Rossini, etj. Në 2020 debutoi në operën e Ostravës në Çeki me rolin e Amelias, opera ‘Un ballo in Maschera’ të G. Verdit, ndërsa në vitin 2021 Flaka do t’i rikthehet rolit të Carmen në festivalin e operës ‘Oper Garten Langenthal’ në Zvicër.

Personalitetin artistik të Flakës e veçon dashuria e madhe që ajo ka për muzikën shqiptare, të cilën ajo e pasuroi me albumin e saj ‘Albanian Flowers’. Prandaj, me shumë vullnet, punë dhe angazhim mbështeti TOK PËR KULTURËN TONË, dhe së bashku me instrumentiste tjera shqiptare nga Vjena, do t’i sjellë për të gjithë ne veprat ‘Luleborë’, ‘Asaman trëndafili çelës’ dhe ‘Kur më vjen burri na stani’.

2. AJO – Londër

Vjollca Robelli Mripa është një këngëtare/autore nga Kosova, e cila jeton në Londër. Muzika e saj merr frymëzim nga trashëgimia shqiptare, duke ngritur zanatin e muzikës tradicionale popullore në territore inovative të xhazit.

3. URACult – Köln

Për “TOK PËR KULTURËN TONË”, nga Kölni paraqitet aktori shqiptar Kasem Hoxha me poezinë e njohur të Fadil Krajës “Cigarja”.

Me një karrierë të bujshme reth 30-vjeçare me mbi 50 role në seri dhe filma gjermanë dhe shqiptarë, Kasem Hoxha zë një vend të merituar në kinematografitë e të dy vendeve.

Ka bashkëpunuar me aktorët dhe regjisorët më të njohur gjermanë e shqiptarë në projekte të ndryshme, shumë prej tyre edhe të shpërblyer në Festivale ndërkombëtare.

Gjithnjë i afërt me bashkëkombasit dhe sa herë që e lejon orari i ngjeshur i punës si aktor, edhe prezent në aktivitetet e komunitetit shqiptar në Gjermani.

4. Marrja Zezë – Berlin

5. Brezi Ynë – Zürich

Edhe Vendim Thaçi do të jetë një nga artistët pjesëmarrës të programit “TOK PËR KULTURËN TONË”.
Të prezentosh gjithë rrugëtimin muzikor të kitaristit 30-vjeçar Vendim Thaçi, do të duhej të përmendnim shumë vende të ndryshme të botës. Si student, pedagog apo si pjesëmarrës festivalesh të ndryshme, Vendim Thaqi veç ka mbledhur përvoja të shumta ndërkombëtare. Një përvojë, deri tani ndoshta ndër më të rëndësishmet, ishte përvoja si student i kitaristit të njohur Pepe Romero, i cili është idoli i tij.

Në koncertet e tij ai luan pjesë të komponistëve të ndryshëm botërorë, por edhe komponime të tij.

Rrugëtimi i tij muzikor e solli atë në Zürich ku sot ai vepron si pedagog dhe performues i muzikës klasike dhe rock. Po ashtu ai vazhdon studimet për Master of Music në drejtimin pedagogjik në klasën e Prof. Anders Miolin në ZhdK në Zürich.

6. ODA – Hamburg

Artistja jonë e cila do ta përfaqësoi ODA Hamburg e.V. në projektin evropian TOK për kulturën tonë është Anda Gjini .

Anda Gjini u lind në vitin 1996 në Prizren. Mësimet i filloi që nga mosha 11 vjeçare me prof. Nora Rrema Alishani. Në vitin 2018 i perfundoi studimet e nivelit Bachelor në degën e flautës në Universitetin e Muzikës në Prishtinë. Anda mori pjesë në shumë festivale dhe masterklasa ndërkombëtare, si dhe koncerte të shumta në Kosovë e më gjerë. Pjesëmarrjet në festivale si “Galway Flute Festival”, „Isa International Summer Academy of the mdw” e pasuruan portfolion e saj si artiste. Gjatë viteve 2019-2020, ishte një nga dhjetë të përzgjedhurit e programit “Tuning In” të organizuar nga Fakulteti i arteve të Vjenës ku u trajnua gjashtë muaj si bursiste nga profesorë me renome botërore. Vlen te përmenden edhe çmimet kombëtare dhe ndërkombetare nëpër gara, si çmimi i parë për performancë të muzikës konteporare kamertale (Vjenë 2019).

Anda punon si pedagoge e flautës dhe momentalisht studion në nivelin Master në Universitetin shtetëror për Muzikë në Karlsruhe (Staatliche Hochschule für Musik Karlsruhe) në Gjermani.